INABSWELTO ng Manila Regional Trial Court Branch 27 nitong Lunes ang 12 pulis na pinangunahan ng Davao City Police Office Director na si Colonel Hansel M. Marantan sa kasong multiple murder kaugnay sa kontrobersyal na engkuwentro sa Atimonan, Quezon noong Enero 6, 2013 kung saan 13 katao ang nasawi.

Sa desisyong inilabas ni Judge Teresa Patrimonio-Soriano, ibinasura ang kaso laban kina Marantan at 11 iba pa dahil sa “paggamit ng katwiran ng pagtupad sa tungkulin.”

Noong Setyembre 19, 2013, isinampa ng Department of Justice ang kaso laban sa mga pulis kabilang sina Superintendent Marantan, Supt. Ramon Balauag, Chief Inspector Grant Gollod, Senior Inspector John Paulo Carracedo, Senior Inspector Timoteo Orig, SPO3 Joselito de Guzman, SPO1 Carlo Cataquiz, SPO1 Arturo Sarmiento, SPO1 Eduardo Oronan, PO2 Nelson Indal, PO2 Al Bhazar Jailani, PO1 Wryan Sardea at PO1 Rodel Talento. Isa sa mga tinamaan si Marantan, na napabagsak sa lupa sa insidente.

Ayon sa korte, ang “mapaminsalang hakbang na pagpapaputok kay Marantan ay nagpapakita ng intensyon na saktan siya, na isang anyo ng ilegal na pananalakay.”

“Sa sitwasyon kung saan ang panganib sa buhay at kaligtasan ng mga pulis at sundalo ay tunay at nalalapit, at batay sa impormasyong armadong-armado ang mga sakay ng Montero SUVs, agad silang kumilos. Makatuwiran ang ginamit na puwersa upang mapigilan ang ilegal na pananalakay,” dagdag pa ng hukuman.

Inatasan ng korte ang pagkansela at pagbabalik ng P300,000 piyansa ng bawat akusado. Samantala, iniutos din ang pag-archive ng kaso ng hindi pa naaarestong si PO2 Al Bhazar Jailani.

Noong Marso 2017, pinayagan ng Judge Liwliwa Hidalgo Bucu ng Manila RTC Branch 34 na makapagpiyansa si Marantan at ang iba pa, dahil “hindi napatunayan ng prosekusyon na malakas ang ebidensyang nagpapatunay ng kanilang pagkakasala.”

Bagaman pinayagan ang piyansa, nilinaw ni Judge Bucu na ito ay “walang paglabag sa patuloy na pagdinig ng kaso.”

Ang Atimonan shootout ay humantong sa pagkamatay ng isang hinihinalang personalidad sa illegal na sugal, dalawang pulis, isang environmentalist, at siyam pang sibilyan. Nakasakay ang mga biktima sa dalawang Montero SUVs nang tambangan sa checkpoint sa Maharlika Highway.

Nag-ugat ang putukan nang barilin si Supt. Marantan sa binti ng isa sa mga sakay ng SUV. Nang bumagsak siya, agad na gumanti ng putok ang mga kasamahan niyang pulis at sundalo. Siyam ang natagpuang patay sa loob ng mga sasakyan, dalawa malapit sa kanal, at dalawa pa habang nilalapatan ng lunas sa ospital.

Narekober sa lugar ang 11 baril mula sa mga napatay, kabilang ang dalawang high-powered firearms.

Si Marantan, na deputy intelligence chief noon ng Police Regional Office 4-A, ang pinuno ng checkpoint sa Maharlika Highway. Ayon sa kanya, pinaputukan sila ng mga sakay ng SUV habang iniinspeksyon, kaya napilitang gumanti.

Aniya, ang mga ito ay miyembro ng sindikato ng ilegal na sugal at guns-for-hire sa Southern Luzon.

Idineklara ng Calabarzon police na isang lehitimong shootout ang nangyari, ngunit iginiit ng National Bureau of Investigation na isa itong “rubout,” dahilan para kasuhan ng multiple murder sina Marantan at mga kasamahan.

Noong Agosto 30, 2013, kinatigan ng DOJ ang reklamong inihain ng NBI at mga pribadong complainant at sinampahan ng kasong multiple murder ang grupo.

Limang taon silang nakakulong sa PNP Custodial Center sa Camp Crame hanggang mapayagan silang magpiyansa ni Judge Bucu.

Nang taong ding iyon, ibinalik si Marantan sa serbisyo matapos paboran ng appellate board ng National Police Commission ang kanyang apela.

Mula noon, pinamunuan niya ang ilang espesyal na yunit ng pulisya tulad ng Philippine Bomb Data Center, Regional Intelligence Division ng NCRPO, at Criminal Investigation and Detection Group – NCR. Sa kasalukuyan, isa siya sa mga pangunahing opisyal sa likod ng pagkakaaresto sa Kingdom of Jesus Christ founder na si Pastor Apollo C. Quiboloy sa kasong human trafficking.

Karamihan sa kanyang mga dating kasamahan ay na-promote na rin sa mas mataas na ranggo matapos muling makabalik sa serbisyo, habang si Balauag ay tuluyan nang nagretiro.