BINUTATA ng House Committee on Justice ang dalawang impeachment complaint na isinampa laban kay President Ferdinand “Bongbong” R. Marcos, Jr. matapos itong ideklara ng nasabing komite na “insufficient in substance”.

Matapos ang ilang oras na deliberasyon sa dalawang impeachment complaint laban kay Pangulong Bongbong Marcos, Jr., nagpatawag ng botohan ang Chairperson ng Committee on Justice na si Batangas Rep. Gerville Luistro.

Ang impeachment complaint laban sa Pangulo ay inihain ni Atty. Andre de Jesus na inendorso naman ni Pusong Pinoy Party List Rep. Jaime Jet Nisay at mga miyembro ng Makabayan Bloc sa Kamara de Representantes.

Naghain ng motion si San Juan Lone Dist. Rep. Ysabel Maria Zamora upang ideklarang “insufficient in susbstance” ang reklamong inihain ni Atty. De Jesus kung saan ito ay mariing tinutulan ni Nisay.

Sa pamamagitan ng botong 42 kontra sa 1 at tatlong kongresista ang nag-abstein, tuluyan ng “nabalagoong” ang naturang impeachment complaint matapos itong ideklarang insufficient in substance.

Sinubukan naman maghain ng mosyon si House Deputy Minority Leader at Caloocan City Rep. Edgar “Egay” Erice para ideklarang sufficient in form ang impeachment complaint na inihain ng Makabayan bloc subalit ito ay tinutulan o binutata naman ni Manila Rep. Bienvenido “Benny” M. Abante, Jr.

Ang motion ni Erice ay pinagbotohan ng Komite kung saan ang naging resulta nito ay 7-39 at walang abstention.

Pagkatapos nang ginanap na deliberasyon ng House Committee on Justice. Magsusumite ito ng report sa Plenaryo ng Kamara de Representantes para pagbotohan naman lahat ng mga kongresista.