ARESTADO ang senior citizen at tatlong iba pa dahil sa pot session sa sa Muntinlupa City.

Walang nagawa sina alyas Vicente, 60; Eric, 50; Augusto, 40; at Carl, 23, nang posasan ng mga tauhan ng Station Intelligence Section ng Muntinlupa City Police matapos salakayin ang drug den nila sa Magdaong Drive, Brgy. Poblacion.

Tinugunan ng mga pulis ang natanggap na impormasyon na madalas magkaroon ng pot session sa naturang lugar kaya nang makumpirmang positibo ang natanggap na tip, sumugod na sila sa lugar dakong alas-11:15 ng gabi.

Bukod sa sachet na may bahid pa ng shabu at drug paraphernalia, isa pang plastic sachet na naglalaman ng shabu na nagkakahalaga ng P6,800 ang nakuha ng mga pulis sa apat na drug suspek.

Sinabi ni Muntinlupa Police Chief P/Col. Robert Domingo na isinailalim na sa inquest proceedings sa Muntinlupa City Prosecutor’s Office ang apat kaugnay sa kakaharapin nilang kasong possession of dangerous drug at drug paraphernalia sa ilalim ng Section 11 at Section 13 ng RA 9165 (Comprehensive Dangerous Drugs Act of 2002).