INARESTO ng pulisya nitong Biyernes si Atty. Levito Baligod at 14 sa tinatawag na “Maleta Boys” kaugnay ng warrant of arrest na inilabas laban sa kanila ng isang korte sa Zambales dahil sa kasong unjust vexation.
Dinakip si Atty. Baligod at ang kanyang mga kliyente na “Maleta Boys,” na mga dating bodyguard ni dating Representative Zaldy Co, sa harap ng New Hall of Justice sa San Juan City.

Pumunta sila roon upang dumalo sa nakatakdang arraignment o pormal na pagbasa ng mga sakdal sa kanila sa ibang kaso.

Noong Setyembre 23, nagrekomenda ang Regional Trial Court (RTC) sa Iba, Zambales ng piyansang P10,000 para sa bawat akusado. Iginiit ng mga ito na may mga maleta na naglalaman ng milyun-milyong pisong cash na ipinadala sa ilang personalidad sa utos ni Co.

Naging kontrobersiyal sina Baligod at ang kanyang grupo dahil sa kanilang mga alegasyon na may mga maletang naglalaman ng perang kickback mula sa mga proyekto ng pamahalaan para sa flood control na ipinadala sa mga kilalang opisyal ng gobyerno.

Hinarap na rin nila ang iba’t ibang kaso, kabilang ang cyberlibel at perjury o pagsisinungaling sa ilalim ng panunumpa, na isinampa ng ilang opisyal ng pamahalaan.

Noong Biyernes ng nakaraang linggo, inaresto rin si Baligod kaugnay ng kasong libelo na isinampa laban sa kanya ni Manila 6th District Rep. Bienvenido Abante. Pinalaya siya matapos maglagak ng P30,000 piyansa, alinsunod sa rekomendasyon ng Manila City RTC Branch 184.

Isinampa ni Abante ang kaso matapos igiit ng mga akusado na tumanggap siya ng mga maleta ng pera noong ika-19 na Kongreso. Mariing itinanggi ng mambabatas ang mga pahayag na ito.

Mariin ding itinanggi ni dating House Speaker Ferdinand Martin T. Romualdez ang lahat ng alegasyon ng plunder laban sa kanya. Itinanggi rin niya ang mga pahayag na ang kanyang kampo ang nag-udyok sa pagbawi ng mga naunang pahayag ng ilan sa mga “Maleta Boys.”

Bilang bahagi ng kanyang depensa, iniharap niya ang mga sinumpaang salaysay ng 25 dating driver at security personnel ni Co na itinangging may anumang paghahatid ng mga maletang puno ng pera kay Romualdez, ang mambabatas mula sa Leyte.