TINIYAK ni House Speaker Martin Romualdez kay Negros Oriental Cong. Arnulfo Teves na sisiguraduhin ng mga otoridad ang kanyang kaligtasan kapag umuwi na ito upang harapin ang mga alegasyong ibinabato sa kanya kaugnay nang pagpatay kay Negros Oriental Governor Roel Degamo kamakailan.

Ito ay kasunod ng patuloy na pagtanggi nitong umuwi na sa bansa dahil sa pangamba para sa kanyang kaligtasan.

Ayon kay Speaker Romualdez, nang makausap niya sa telepono si Teves ay pinaalalahanan niya ito na walang mangyayari kung hindi niya haharapin ang mga nasabing alegasyon.

Nabatid na Marso 9 ang huling araw ng leave o bakasyon ni Teves, base na rin sa travel clearance na isinumite nito sa Kongreso.

Kaya naman, sinimulan na ng House Ethics Committee ang pagdinig kung kailangan na bang patalsikin sa Kongreso o suspindihin muna ang naturang mambabatas dahil sa hindi pagsunod sa utos ni Speaker Romualdez na umuwi sa bansa.

“Natatakot siya sa kanyang seguridad pag umuwi daw siya. I told him, kami na ang bahala doon. Basta kailangan umuwi ka na para sagutin itong kaso mo dito,” ayon pa kay Speaker Romualdez.

Aniya, “Well, not coming home is not an option for him. Because at the end of the day, mahuhuli din siya kahit saan pa siya kapag napatunayan na nagkasala siya dito sa korte natin.”

Matatandaang si Teves ay itinuturo bilang isa sa utak sa likod nang pagpatay kay Degamo.