𝗕𝗜𝗟𝗔𝗡𝗚 𝗶𝘀𝗮 𝘀𝗮 𝗺𝗴𝗮 “𝗮𝗻𝘁𝗶-𝗣𝗵𝗶𝗹𝗶𝗽𝗽𝗶𝗻𝗲 𝗢𝗳𝗳𝘀𝗵𝗼𝗿𝗲 𝗚𝗮𝗺𝗶𝗻𝗴 𝗢𝗽𝗲𝗿𝗮𝘁𝗼𝗿𝘀 (𝗣𝗢𝗚𝗢)” 𝗮𝗱𝘃𝗼𝗰𝗮𝘁𝗲𝘀, n𝗮𝗻𝗶𝗻𝗶𝗻𝗱𝗶𝗴𝗮𝗻 𝘀𝗶 𝗜𝘀𝗮𝗯𝗲𝗹𝗮 𝟲𝘁𝗵 𝗗𝗶𝘀𝘁. 𝗖𝗼𝗻𝗴. 𝗙𝗮𝘂𝘀𝘁𝗶𝗻𝗼 “𝗜𝗻𝗻𝗼” 𝗔. 𝗗𝘆 𝗩 𝗻𝗮 𝗱𝗮𝗽𝗮𝘁 𝘀𝗶𝗺𝘂𝗹𝗮𝗻 𝗻𝗴 𝗸𝘂𝗺𝗽𝗶𝘀𝗸𝗮𝗵𝗶𝗻 𝗻𝗴 𝗽𝗮𝗺𝗮𝗵𝗮𝗹𝗮𝗮𝗻 𝗮𝗻𝗴 𝗺𝗴𝗮 𝗽𝗮𝗴-𝗮𝗮𝗿𝗶 𝗮𝘁 𝗶𝗯𝗮’𝘁-𝗶𝗯𝗮𝗻𝗴 𝗮𝘀𝘀𝗲𝘁𝘀 𝗻𝗴 𝗺𝗴𝗮 𝗖𝗵𝗶𝗻𝗲𝘀𝗲 𝗻𝗮𝘁𝗶𝗼𝗻𝗮𝗹𝘀 𝗻𝗮 𝗻𝗮𝘀𝗮 𝗹𝗶𝗸𝗼𝗱 𝗻𝗴 𝗺𝗮𝗹𝗮𝘄𝗮𝗸 𝗻𝗮 𝗼𝗽𝗲𝗿𝗮𝘀𝘆𝗼𝗻 𝗻𝗴 𝗻𝗮𝘀𝗮𝗯𝗶𝗻𝗴 𝗶𝗹𝗹𝗲𝗴𝗮𝗹 𝗻𝗮 𝘀𝘂𝗴𝗮𝗹 𝘀𝗮 𝗣𝗶𝗹𝗶𝗽𝗶𝗻𝗮𝘀.

Gaya ng paniniwala ni Senator Risa Hontiveros, ganito rin ang paninindigan ni Dy na kailangan talagang kumpiskahin ng gobyerno ang anumang pag-aari ng POGO na maaari din naman mapakinabangan.

Pagdidiin pa ni Dy, sabihin man na nagpalit ng anyo ang dating POGO na ngayo’y tinatawag na Internet Gaming Licenses (IGL) iisa parin aniya ang kulay nito.

Aniya nakakulapol pa rin dito ang samu’t-saring kriminalidad gaya ng krimen, kidnapping, human-trafficking, prostitution, torture, bentahan ng illegal na droga at iba pa.

Sabi din ng kongresista, kahit gaano man kalaki ang ganansiya o income na nakukuha ng Philippine Amusement and Gaming Corporation (PAGCOR) mula sa POGO hindi parin aniya maikakaila na napakalaking panganib at banta din ang naidudulot ng POGO sa seguridad ng bansa kabilang na ang katahimikan ng mamamayang Pilipino.

Ipinahayag ni Dy na maraming ari-arian ang POGO na maaaring mapakinabangan ng pamahalaan na puwede rin ibigay sa mga naging biktima ng POGO o yung mga taong nakaranas ng matinding hirap at pagmamalabis.

Ikinagalak din ni Dy ang naging posisyon ni President Ferdinand “Bongbong” R. Marcos, Jr. laban sa POGO na inihayag nito sa kaniyang ikatlong State of the Nation Address (SONA).