𝗠𝗨𝗟𝗜𝗡𝗚 𝗯𝗶𝗻𝗶𝗴𝘆𝗮𝗻𝗴 𝗱𝗶𝗶𝗻 𝗻𝗶 𝗢𝗙𝗪 𝗣𝗮𝗿𝘁𝘆 𝗟𝗶𝘀𝘁 𝗖𝗼𝗻𝗴. 𝗠𝗮𝗿𝗶𝘀𝘀𝗮 “𝗗𝗲𝗹 𝗠𝗮𝗿” 𝗣. 𝗠𝗮𝗴𝘀𝗶𝗻𝗼 𝗻𝗮 𝗻𝗮𝗻𝗮𝗻𝗮𝘁𝗶𝗹𝗶 𝗮𝗻𝗴 𝗸𝗮𝗻𝗶𝘆𝗮𝗻𝗴 𝗽𝗮𝗻𝗶𝗻𝗶𝗻𝗱𝗶𝗴𝗮𝗻 𝗹𝗮𝗯𝗮𝗻 𝘀𝗮 𝘀𝘂𝗴𝗮𝗹 𝗮𝘁 𝗹𝗮𝗿𝗼𝗻𝗴 e-s𝗮𝗯𝗼𝗻𝗴 𝘀𝗮 𝗸𝗮𝗯𝗶𝗹𝗮 𝗻𝗴 𝗻𝗮𝗴𝗶𝗻𝗴 𝗽𝗮𝗵𝗮𝘆𝗮𝗴 𝗻𝗴 𝗣𝗵𝗶𝗹𝗶𝗽𝗽𝗶𝗻𝗲 𝗔𝗺𝘂𝘀𝗲𝗺𝗲𝗻𝘁 𝗮𝗻𝗱 𝗚𝗮𝗺𝗶𝗻𝗴 𝗖𝗼𝗿𝗽𝗼𝗿𝗮𝘁𝗶𝗼𝗻 (𝗣𝗔𝗚𝗖𝗢𝗥) 𝗻𝗮 𝗺𝗮𝗮𝗮𝗿𝗶𝗻𝗴 𝗽𝗮𝗴𝗸𝘂𝗵𝗮𝗻𝗮𝗻 𝗶𝘁𝗼 𝗻𝗴 𝗺𝗮𝗹𝗮𝗸𝗶𝗻𝗴 𝗸𝗶𝘁𝗮 𝗼 𝗿𝗲𝘃𝗲𝗻𝘂𝗲𝘀 𝗸𝗮𝗽𝗮𝗹𝗶𝘁 𝗻𝗴 𝗣𝗵𝗶𝗹𝗶𝗽𝗽𝗶𝗻𝗲 𝗢𝗳𝗳𝘀𝗵𝗼𝗿𝗲 𝗚𝗮𝗺𝗶𝗻𝗴 𝗢𝗽𝗲𝗿𝗮𝘁𝗼𝗿𝘀 (𝗣𝗢𝗚𝗢).

Binigyang linaw ni Magsino na hindi aniya nagbabago ang kaniyang posisyon at paninindigan sapagkat magpahanggang ngayon ay mahigpit nitong tinututulan ang paniniwala ng PAGCOR na puwedeng maging kapalit ng POGO ang E-Sabong sa aspeto ng pangangalap ng malaking ganansiya o kita.

Naglabas ng video statement si Magsino upang linawin ang ilang issues at mga intrigang ipinupukol laban sa kaniya matapos ang ginawa nitong pagtatanong sa PAGCOR kaugnay sa isinagawang budget briefing ng nasabing ahensiya sa Kamara de Representantes.

Ipinaliwanag ng OFW lady solon na dapat iwasan ang lahat ng illegal na gawain katulad ng e-sabong na batid naman aniya ng lahat ng mamamayan ang masama at negatibong epektibo na idinudulot nito sa lahat ng mga taong nalululong dito gaya ng pagkalubog sa napakalaking utang at pagka-bangkarote.

“Unang-una po ipinapa-alam ko po sa inyo na ang inyong lingkod ay hindi gusto at mahigpit na tumututol sa e-sabong. Basta lahat po ng illegal na gawain ay dapat po nating iwasan dahil nakakasira po ito ng ating buhay,” ayon kay Magsino.

Ayon pa kay Magsino, ang kaniyang pagtatanong sa budget briefing ng PAGCOR ay paglilinaw lamang dahil nais umano nitong malaman ang mga ipinapatupad na patakaran at polisiya ng nasabing ahensiya patungkol sa mga online gaming na pinagkukuhanan ng PAGCOR ng pondo.

Pagdidiin pa ng kongresista na nais lamang ng OFW Party List na mabigyan ng kaukulang solusyon ang pangangalap ng pondo ng PAGCOR sapagkat layunin nilang matulungan ang pamahalaan sa aspeto ng pangangalap ng revenues na makakatulong ng malaki para sa mga isinusulong nitong programa.

“Ang ating pagtatanong ay clarification lamang dahil nais natin na makatulong sa pamahalaan sa mga pamamaraan para pagkuhanan ng pondo. Gustong gusto po natin na mabigyan ng solusyon para makatulong tayo sa pamahalaan na makakalap ng pondo para sa mga proyektong isinusulong nito,” sabi pa ni Magsino.