PATAY ang isang lalaki nang malunod at nakaligtas pero sugatan ang kaibigan niya ng tangayin sila ng malakas na agos sa Ilog Baho sa Tumana, Sitio Kaysakat, Brgy. San Jose, Antipolo City noong Linggo.

Nasagip pa ang biktimang si Raizuki Talledo at nilapatan ng cardiopulmonary resuscitation pero patay na din ng madala sa ospital.

Ginagamot sa Cabading District Hospital ang sugatang si San Lenard Toculas, ayon sa mga pulis.

Base sa ulat ng Antipolo police, nalunod ang biktima dakong alas 3:00 ng hapon. Nagkayayaan lang ang magkakaibigan na maligo sa ilog pero nauwi sa trahedya ang water adventure nila.

Ayon sa ibang saksi, inanod ng malakas na agos ang dalawa at nadala sa malalim na parte ng ilog.