PINAYUHAN ng Palasyo ng Malakanyang ang publiko na mag-ingat sa vog dahil sa pag-aalburuto ng Bulkang Taal.

Ayon kay Presidential Communications Office (PCO) Assistant Secretary Joey Villarama, tagapagsalita ng Natural Calamities Disasters, mas makabubuti kung magsusuot ng face mask ang mga bata, matatanda at mga may sakit.

Ayon kay Villarama, humahalo ang abo sa ulan kaya’t nakaiirita sa mata at balat.

Bukod dito, mataas din aniya ang polusyon na maaring magdulot ng acid rain.

Nakikipag-ugnayan na aniya ang Malakanyang sa ibat ibang ahensya ng pamahalaan para kung kailangan na ilikas ang mga apektadong residente ay madali itong magagawa.

Sa ngayon, nanatili sa Alert Level 1 ang Bulkang Taal.