SUGATAN ang 64-anyos na ginang at tatlong motorsiklo ang nadaganan ng steel beam na nahulog mula sa tractor head na dumadaan sa Mel Lopez Boulevard at Marjovic Road sa Vitas Tondo, Maynila noong Sabado.

Nahaharap sa kasong Multiple Damage to Properties at Slight Physical Injury ang driver ng truck na nakilalang si Leopoldo Gunday, 47, ng Marilao, Bulacan.

Ayon sa ulat ni Police Staff Sergeant Allanion Dela Cruz, bandang alas-4:30 ng umaga nang maganap ang insidente. habang tinatahak ng tractor head ang lugar.

Biglang kumalas ang mga steel beam pagliko ng truck, ayon sa report, at aksidenteng tinamaan ang tatlong naka park na motorsiklo sa tabi ng kalsada at nasugatan ang 64-anyos na noo’y nasa loob ng tindahan.