𝗡𝗔𝗡𝗜𝗡𝗜𝗡𝗗𝗜𝗚𝗔𝗡 𝘀𝗶 𝗠𝗮𝗻𝗶𝗹𝗮 𝟮𝗻𝗱 𝗗𝗶𝘀𝘁. 𝗥𝗲𝗽. 𝗥𝗼𝗹𝗮𝗻𝗱𝗼 “𝗖𝗥𝗩” 𝗠. 𝗩𝗮𝗹𝗲𝗿𝗶𝗮𝗻𝗼 𝗻𝗮 𝗻𝗮𝗿𝗮𝗿𝗮𝗽𝗮𝘁 𝗹𝗮𝗺𝗮𝗻𝗴 𝗻𝗮 𝗽𝗮𝗽𝗮𝗻𝗮𝗴𝘂𝘁𝗶𝗻 𝗮𝘁 𝗸𝗮𝘀𝘂𝗵𝗮𝗻 𝗮𝗻𝗴 𝗺𝗴𝗮 𝗼𝗽𝗶𝘀𝘆𝗮𝗹 𝗻𝗴 𝗴𝗼𝗯𝘆𝗲𝗿𝗻𝗼 𝗻𝗮 𝗺𝗮𝗽𝗮𝗽𝗮𝘁𝘂𝗻𝗮𝘆𝗮𝗻𝗴 “𝘄𝗶𝗻𝗮𝘄𝗮𝗹𝗱𝗮𝘀” 𝗹𝗮𝗺𝗮𝗻𝗴 𝗻𝗶𝗹𝗮 𝗮𝗻𝗴 𝗽𝗼𝗻𝗱𝗼 𝗻𝗴 𝗯𝗮𝘆𝗮𝗻 𝘀𝗮 𝗺𝗮𝗹𝗶𝗻𝗴 𝗽𝗮𝗿𝗮𝗮𝗻 𝗮𝘁 𝗵𝗶𝗻𝗱𝗶 𝗻𝗶𝗹𝗮 𝗺𝗮𝗶𝗽𝗮𝗹𝗶𝘄𝗮𝗻𝗮𝗴 𝗸𝘂𝗻𝗴 𝘀𝗮𝗮𝗻 𝗻𝗶𝗹𝗮 𝗴𝗶𝗻𝗮𝘀𝘁𝗼𝘀 𝗮𝗻𝗴 𝗯𝘂𝗱𝗴𝗲𝘁 𝗻𝗴 𝗸𝗮𝗻𝗶𝗹𝗮𝗻𝗴 𝗮𝗵𝗲𝗻𝘀𝗶𝘆𝗮.

Kinatigan din ni Valeriano, chairman ng House Committee on Metro Manila Development, ang ibinigay na babala ni House Speaker Ferdinand Martin Gomez Romualdez na hindi kukunsintihin ng Kamara de Representantes ang maling paggamit sa pondong galing buwis ng mamamayan.

Dahil dito, binigyang diin ni Valeriano na kinakailangan talagang bantayan ang bawat ahensiya ng gobyerno para tiyakin na nagagamit nila ng maayos at tama ang kanilang pondo hindi gaya ng ginawa umano ng Office of the Vice President (OVP) kung saan hindi nila maipaliwanag ng maayos kung saan at papaano nila ginasta ang kanilang budget mula noong 2022.

Paliwanag ng kongresista na mayroong pananagutan ang bawat government agency kasama na ang Kongreso na maging “accountable” sa pondong ipinagkakatiwala sa kanila. Kaya obligasyon din nila na huwag lustayin ng walang pakundangan ang pera ng taumbayan para lamang sa kanilang pansariling kapakanan at interes.

Magugunitang nagbigay ng kaniyang privilege speech si Valeriano sa Plenaryo ng Kamara de Representantes para batikusin ang naging masamang asal ni Vice President Inday Sara Duterte sa pagharap nito sa budget deliberation ng House Committee on Appropriations para sa kanilang 2025 proposed national budget.

Ayon kay Valeriano, hindi maipaliwanag ni VP Sara kung papaano nito ginastos ang badyet ng OVP kaya idinaan na lamang nito sa pabalang-balang at pabalagbag na sagot ang mga tanong sa kaniya ng mga kongresista para sadyang makaiwas sa masusing pagbusisi sa pondo ng OVP.

Muling binigyang diin ng kinatawan ng Maynila na tungkulin ng Kongreso na busiing mabuti ang panukalang badyet ng bawat ahensiya ng gobyerno kabilang na ang OVP.