TAHASANG kinontra ni Senate President Francis “Chiz” Escudero ang kamakailan na pahayag ni dating Pangulong Rodrigo Duterte na tumataas ang antas ng krimen sa ilalim ng administrasyon ni Pangulong Ferdinand “Bongbong” Marcos Jr., gamit ang mga opisyal na datos upang liwanagin ang katotohanan dito.

Tinukoy ni Escudero ang mga estadistika mula sa Philippine National Police (PNP) at mga datos na kinolekta ng Legislative Budget Research and Monitoring Office (LBRMO), na nagpapakita ng malaking pagbaba ng krimen sa panahon ni Marcos.

Ayon kay Escudero, malinaw ang sinasabi ng datos: ang krimen ay bumaba nang malaki, taliwas sa mga pahayag ni Duterte.

“All claims must be grounded in facts and thorough studies, not mere words,” iginiit ni Escudero, na nananawagan para sa “concrete numbers and data” upang suportahan ang ganitong uri ng mga pahayag.

Tinukoy niya ang datos mula sa LBRMO na naghambing ng estadistika ng krimen mula Hulyo 2022 hanggang Abril 2024 sa ilalim ng administrasyon ni Marcos at mula Hulyo 2016 hanggang Abril 2018, sa panahon ng termino ni Duterte. Ayon sa mga natuklasan, ipinakita na mayroong 61.87% na pagbaba sa krimen sa ilalim ng pamumuno ni Marcos.

Sa kanyang pahayag, nagbigay si Escudero ng opisyal na mga numero, sinasabi na: “Ayon sa ilang testigo, bumaba daw ang kriminalidad noong panahong may EJK at nagde-debate sila… Kayat kinuha ko ang data dito sa LBRMO… July 1, 2016 to April 21, 2018… kumpara namin sa July 1, 2022 at April 21, 2024 para parehong datos at maliwanag na ang malaking kaibahan kung saan ay napakalaki ng pagbaba ng kriminalidad sa ilalim ng kasalukuyan administrasyon.”

Sa usapin ng extrajudicial killings (EJK), iginiit ni Escudero na ang mga insidenteng ito ay dapat maisama sa estadistika ng krimen: “Hindi pwedeng hindi bilangin ang patayan. Krimen pa rin yan eh. Extrajudicial killing, it’s a crime. Hindi mo pwedeng hindi bilangin yan sa crime index.”

Binibigyang-diin niya na ang extrajudicial killings ay isang uri ng krimen at hindi dapat maalis sa mga datos ng krimen.

Nagbigay si Escudero ng mga tiyak na numero ng paghahambing, na sinasabing mas mataas ang antas ng krimen noong panahon ni Duterte.

“Mas mataas ang krimen noong panahong yan, 16-18, 60%. Halos triple,” ayon sa kanya, na naglalarawan ng pagkakaiba sa pagitan ng 2016-2018 at kasalukuyang datos sa administrasyon ni Marcos jr..

Niliwanag din ni Escudero na bukas ang Senado sa lahat ng mga nais makakuha ng kopya ng dokumento lalot patungkol ito sa nagdaan pagdinig kung saan ay dumalo si dating Pangulo Duterte dahil pampublikong record aniya ito.

“It is a public document… We will most likely even put this in our website as part of transparency.” Ang pangakong ito ay nagpapakita ng dedikasyon ng Senado sa pagbibigay ng impormasyon sa publiko. “ giit ng pangulo ng senado.

Dagdag pa dito, hinimok ni Escudero ang mga biktima ng extrajudicial killings na maghain ng legal na aksyon batay sa mga bagong pahayag sa naganap na pagdinig. “Sana huwag silang tumigil doon, idiretsyo nila sa pagsampa ng kaso. Hindi naman dapat end all be all yung makapagsalita sa hearing under oath.”

Ipinahayag niya ang pag-asa na ang mga biktima ay magpatuloy sa paghahanap ng hustisya, at binigyang-diin na hindi dapat natatapos sa pagdinig ang laban.

Sa huli, idiniin ni Escudero na ang mga bagong kaganapan na ito ay nagbibigay sa publiko ng pagkakataong maunawaan ang buong saklaw ng mga pangyayari. Ipinahayag niya na ang komprehensibong ulat ng datos, transparency, at pananagutan ay mahalaga sa serbisyo ng gobyerno, sa pagpapatupad ng batas, at pamahalaan.