TATLONG kalalakihan ang naaresto ng mga kapulisan matapos umanong tutukan ng baril ang isang security guard sa Arcoe Residence, Brgy Muntingpulo, Lipa City, Lunes ng umaga.

Ayon sa pulis ang biktima ay nakilalang si alyas Marvin, 27, walang asawa, OIC Guard ng Northern Negros Security Agency, at stay-in sa Arcoe Residence.

Sa imbestigasyon, ang biktima ay nag-aasikaso ng mga report sa loob ng kanyang opisina nang biglang dumating ang mga suspek na may bitbit na baril at galit na hinarap siya tungkol sa pagkaantala ng kanilang mga sahod.

Nagsimula nang magpaliwanag ang biktima ngunit dahil sa hindi pagkakaintindihan, bigla umanong itinutok ni alyas John, 30, ang 12-gauge shotgun at agad na kinalabit ang gatilyo ngunit sa kabutihang palad ay hindi pumutok ang baril.

Sa pagkakataong iyon, lumaban ang biktima ngunit sinuntok siya ni alyas John sa panga habang tinutukan siya ng baril ni alyas Alvin.

Tumakbo ang biktima at hinabol siya ng mga suspek kasama si alyas Noel na may hawak umanong itak.

Ang kaguluhan ay pinakalma ni alyas Rodrigo, isang security guard.

Humingi ng tulong ang biktima sa mga opisyal ng barangay na kalaunan ay inereport ang sitwasyon sa pulis Lipa. Agarang naaresto ang tatlong suspek.

Narekober mula kay mula kay alyas John ang 12 gauge AR-5 shotgun at Shooters Guardian 9mm pistol.

Inihahanda na ng mga kapulisan ang mga kaukulang dokumento para sa pagsasampa ng kaso laban sa mga suspek.