Calendar
Parang maamong tupa ang suspek sa loob ng presinto matapos maaresto dahil sa pagsigaw habang may hawak na baril sa Sampaloc, Manila.
Naghahamon ng away na may boga, dinampot ng parak
DINAMPOT ng mga tauhan ng Manila Police District-Sampaloc Police Station 4 ang lalaki makaraang magsisigaw habang may hawak na baril noong Linggo sa Luzon Avenue corner Gerardo St., Brgy. 562, Zone 55, Sampaloc, Manila.
Base sa ulat, bandang alas-2:35 ng madaling araw nang mabulabog ang katahimikan sa lugar makaraang magsisigaw at naghahamon ng away ang suspek na si alyas Baduy habang may hawak na baril.
Sa report ni Police Major Gil John Lobaton, duty officer of the day, nakumpirma na isang lalaki na naka pulang sando, puting short pants ang nagsisigaw sa kalye habang armado ng baril.
Nagresponde sina Police Staff Sergeant Melvin Mempin at Corporal Aaron Reyes upang kumpirmahin kung totoo ang sumbong na may nagwawala.
Doon na nadatnan ng mga pulis ang suspek at dinisarmahan ng baril na may 2 bala.
Nahaharap sa kasong paglabag sa Republic Act 10591 (Comprehensive Firearms and Ammunition Regulation Act) ang suspek.
