SIMULA sa Lunes, Abril 11, ay balik na ang libreng sakay na ibinibigay ng Land Transportation Franchising and Regulatory Board (LTFRB).

Ayon kay LTFRB executive director Maria Kristina Cassion, naghahanda na ang ahensya para sa pagbabalik ng kanilang service contracting program o pagbabayad sa mga pampublikong sasakyan para magbigay ng libreng sakay sa publiko.

Dahan-dahan umano ang implementasyon ang programa habang kinokompleto pa ng ilang operator ang mga kinakailangang requirements.

Ang service contracting program ay mayroong P7 bilyon pondo sa ilalim ng 2022 General Appropriations Act.

Saklaw ng programa ang 1,000 ruta sa buong bansa at lalahukan ng 13,000 hanggang 15,000 pampasaherong sasakyan.