INILUNSAD ng Bureau of Immigration (BI) nitong Miyerkules ang kanilang online na aplikasyon para sa student visa at permit.

Pinuri ni BI Commissioner Joel Anthony Viado ang proyekto, na sinabing isa itong hakbang patungo sa layunin ng BI na makamit ang modernisasyon sa pamamagitan ng automation ng mga serbisyo.

“This is a priority project of the BI to make things easier and more secure for foreign students to apply for their visas and permits,” sabi ni Viado.

Pinapayagan ng sistema ang mga paaralan na direktang mag-apply sa BI, na nag-aalis ng hindi kailangang mga papeles at nagbibigay ng kaginhawahan sa pamamagitan ng online na aplikasyon.

Maaaring ma-access ang serbisyo sa e-services website ng BI sa e-services.immigration.gov.ph.

Ayon kay Viado, ang sistemang ito ay ambag ng BI sa pagsusumikap ng bansa na gawing nangungunang education hub sa Asya ang Pilipinas.