ARESTADO noong Biyernes ang lalaking nahulihan ng isang gramo ng shabu at nakawan ng isang kotse pero hindi nahuli ang kasabwat niya sa krimen sa Cainta, Rizal.

Ayon sa ulat, nangyari ang krimen bandang alas-5:30 ng hapon sa parking area ng grocery store sa A. Bonifacio Avenue Brgy. Sto Domingo, Cainta at nahuli ang suspek na si alyas Axel, 28.

Ninakawan umano ang kotse ng biktimang si alyas Nor, 27, company driver, at nakuha ang body bag na may lamang wallet, IDs, relo at P60,000 cash.

Ayon sa salaysay ng biktima, natanaw niya ang isang lalaki na nasa loob ng kanyang kotse.

Kinumpronta niya ang suspek pero tumakbo na dala ang mga ninakaw na items.

Humingi ng tulong ang biktima sa Cainta police at kinilala ang suspek sa tulong ng rogues’ gallery.

Hawak na ng mga pulis ang suspek at nakuhanan pa ng 1 gramo ng shabu na may standard price na P6,800.

Nakapiit sa Cainta custodial facility ang suspek na mahaharap sa kasong paglabag sa RA 9165 (Comprehensive Dangerous Drugs Act of 2002) at theft habang malaya pa ang kasama niya.