NAARESTO ng pulisya ang isa pang suspek at diumano’y utak sa pagdukot at pagpatay sa isang negosyante noong nakaraang linggo sa isang fastfood chain sa Mandaluyong City.______

Nadakip sa isinagawang follow-up operation ng Criminal Investigation and Detection Unit (CIDU) sa pangunguna ni Major Dondon Llapitan sa isang fastfood chain sa Wack Wack, Mandaluyong City, si Victor Vidal Dueñas, 62, alyas John Paul Dwight, na residente ng Ayala Alabang, Muntinlupa City.

Si Dueñas ang itinuturong mastermind ng mga suspek na sina Noli Cape, 29, at Mervin Armas, 44, na una nang nahuli ng mga pulis sa harap ng Rubber Vulcanizing Shop matapos na buntutan ng mga operatiba.

Nabatid na nakatanggap ng tawag si Cape mula kay Dueñas at nagkasundo na ibibigay ang kabuuang bayad sa pagdukot at pagpatay sa 62-anyos na negosyanteng si William Pascaran Sr.

Sinakal at pinatay ang biktima habang nakaposas ang mga kamay saka isinako at inilibing ng mga suspek sa isang bakanteng lote sa Barangay Minuyan Proper, San Jose Del Monte, Bulacan.

Ibinunyag ni Cape na inutusan sila ni Dueñas na i-monitor ang kilos ng biktima at magpanggap na buyer ng mga isdang tilapia.

Nais din umano ni Dueñas na makuha ang titulo ng lupa ng fish farm ng biktima. Subalit nang hindi maibigay ng biktima, inutos na ni Dueñas na patayin ang biktima at dalhin sa ibang lugar.

Sinisilip din ng pulisya ang umano’y pagiging land grabber ni Dueñas.

Ayon naman sa pulisya, gawain umano ni Dueñas na mangidnap at magpapatay sa oras na wala na siyang mapapakinabangan.

Si Dueñas ay positibong ring itinuro ng aktres na si Rochelle Barrameda na siyang suspek sa pagpatay sa kanyang kapatid na si Ruby Rose Barrameda noong 2007.

Pinatay at isinilid umano ni Dueñas ang katawan ni Ruby Rose sa drum at inilubog sa ilog sa Navotas City.

Subalit ayon kay Rochelle, kilala niya si Dueñas bilang Lope Jimenez na isang fishing magnate.

Si Dueñas, na ginagamit din ang alyas Lope Jimenez, ay tiyuhin ng asawa ni Ruby Rose na si Manuel Jimenez III.

Patuloy pa rin ang imbestigasyon ng pulisya upang matukoy ang tunay na motibo ng pamamaslang sa biktimang si Pascaran, habang tuluy-tuloy ang manhunt laban kina alyas Jonel, alyas Jervin at alyas Jerwin.