SUGATAN ang 13 magsasaka matapos na mabundol ng pampasaherong bus ang sinasakyang kuliglig nitong Lunes ng gabi sa kahabaan ng national highway sa Roxas , Isabela.

Nakilala ang mga biktima na sina Alfredo Altura, Jodel Tagalisma, Rico Darwin , Mitch Valdez, Edwin Obina, Rachelle Busca, Oscar Tagalisma, Vincent Antonio, Angelica Agustin, Renato Busca, Ryan Jay Farinas, Johnson Vicena at isang menor de edad.

Batay sa ulat ng Roxas Police Station, patungo sana ang mga biktima sa bayan ng Kalinga para makitanim nang maganap ang aksidente.

Madilim din ang daan sa highway kaya’t hindi napansin ng bus ang sasakyan ng mga biktima.

Agad na naisugod ang mga biktima sa pagamutan kung saan tatlo sa kanila ng kritikal habang nasa kustodiya naman ng PNP ang driver ng bus.

Wala namang naiulat na nasugatan sa mga pasahero ng bus.