NANAWAGAN si House Deputy Majority Leader Paolo Ortega V ng La Union kay Vice President Sara Duterte at sa kanyang mga kaalyado na itigil ang paggamit ng legal na proseso bilang taktika upang ilihis ang atensyon ng publiko mula sa kinakaharap nitong impeachment case.

Binatikos ni Ortega ang sunod-sunod na mga kasong inihahain sa Korte Suprema at Office of the Ombudsman laban sa mga lider ng Kamara de Representantes na tumupad lamang sa kanilang tungkulin sa impeachment process.

Giit ng mambabatas, ang mga ito ay hindi tunay na paghahanap ng hustisya kundi paraan ng pananakot at paglikha ng ingay sa media.

“This is a clear abuse of legal processes. Instead of addressing the serious allegations of corruption and misuse of public funds, the Vice President and her camp are wasting the time of our courts with frivolous cases designed to harass those who simply did their duty,” ani Ortega.

Dagdag pa niya, “Sana harapin na lamang ni VP Duterte ang lahat ng nilalaman ng impeachment na iniwasan niya noon sa imbestigasyon ng Kamara.”

Binigyang-diin ni Ortega na ang ginawang impeachment kay VP Duterte ay naaayon sa Saligang Batas. Binalaan din niya ang paggamit ng hudikatura upang takutin ang mga mambabatas at ilihis ang atensyon ng publiko.

“We see this for what it is—an attempt to intimidate the House, divert attention from the issues, and create noise to mislead the public. But no amount of legal theatrics can erase the facts: there were serious and questionable transactions in the Vice President’s use of confidential funds and in the Department of Education under her watch,” paliwanag ni Ortega.

Hinikayat din niya ang kampo ni Duterte na igalang ang demokratikong proseso at harapin ang mga paratang laban sa kaniya sa halip na gumamit ng taktikang panggigipit.

“If the Vice President is truly innocent, she should face the charges head-on and explain herself to the Filipino people, instead of resorting to harassment tactics. The public deserves the truth, not distractions,” dagdag pa niya.

Tiniyak naman ni Ortega na hindi matitinag ang Kongreso sa pagtupad ng mandato nito na tiyakin ang pananagutan sa gobyerno, anuman ang taktika ng pananakot na gawin upang pigilan ang katotohanan.

“These intimidation tactics will not succeed. The House remains firm in its commitment to upholding transparency and accountability in government. We will not allow anyone—no matter how powerful—to evade scrutiny,” pagtatapos niya.