NANAWAGAN si Senador Sherwin Gatchalian sa mga tumakbong kandidato at kanilang mga tagasuporta na maging responsable sa paglilinis ng mga campaign material na ikinalat sa panahon ng eleksyon.

Ayon sa kanya, hindi dapat matapos sa halalan ang pagiging makabayan—dapat din itong ipakita sa pangangalaga sa kapaligiran.

“Basura mo, linisin mo—it’s a simple principle of accountability,” aniya, sabay giit na “Sila dapat ang manguna sa kampanya na linisin ang ating mga lugar ng campaign materials dahil dagdag pasakit sa ating kalikasan.”

Ipinunto ng senador na bagama’t mahalaga ang eleksyon sa isang demokratikong lipunan, hindi dapat ito magdulot ng dagdag na polusyon.

“Bagamat napakaimportante ng eleksyon para sa ating demokrasya, hindi ito dapat maging sanhi ng dagdag polusyon sa ating mga komunidad,” wika niya.

Ang panawagang ito ay kasabay ng malawakang post-election cleanup drive sa buong bansa.

Ayon sa Metropolitan Manila Development Authority (MMDA), tinatayang 11.18 tonelada ng campaign materials ang nakolekta pa lamang sa unang araw ng operasyon sa mga lungsod tulad ng Maynila at Quezon City.

Ang mga ito ay isinasaayos upang mairecycle o maipamahagi sa mga grupong gaya ng EcoWaste Coalition at Tahanang Walang Hagdan.

Samantala, nananawagan din ang Department of Environment and Natural Resources (DENR) sa mga lokal na pamahalaan na pabilisin ang pagbaklas at muling pagproseso ng election waste.

Sa Iloilo, inilunsad ang programang “Limpyo Eleksyon 2025: Operation Baklas,” kung saan mahigit 400 kilo ng campaign material ang nakolekta sa unang araw pa lamang. Layunin ng inisyatibang ito na gawing muli’t magamit ang mga materyales imbes na masayang.

Sa kabuuan, ang panawagan ni Gatchalian ay kaagapay ng mga hakbang upang mapanatiling malinis ang kapaligiran at patunayan na ang pagiging mamamayan ay hindi natatapos sa pagboto—kundi umaabot hanggang sa responsableng pag-aalaga sa kalikasan.