TINIYAK ni Senador Mark Villar na hindi magiging pabigat sa pambansang badyet ang bagong batas na nagtataas sa pensiyon ng mga retiradong kawani ng Department of Foreign Affairs (DFA).

Ang Republic Act No. 12181, na kamakailan lamang nilagdaan bilang batas, ay naglalayong bigyan ng makatarungan at mas mataas na benepisyo ang mga dating diplomat na naglingkod sa bansa.

Ang batas, na dating Senate Bill No. 2863, ay nagtatakda ng pension differential—isang dagdag sa buwanang pensiyon upang itama ang agwat sa benepisyong tinatanggap ng mga maagang nagretiro kumpara sa mga kamakailan lamang nagretiro.

“Funding will come from the fees charged for consular services collected under Executive Order No. 906, series of 2010, and not from the General Appropriations Fund,” paglilinaw ni Villar, upang tiyakin na hindi maaapektuhan ang pondong nakalaan para sa iba pang pangunahing serbisyo ng pamahalaan.

Ayon sa batas, ang mga kwalipikadong DFA retirees ay makatatanggap ng buwanang dagdag sa pensiyon—ang diperensiya sa pagitan ng bagong kalkulasyon ng DFA at ng kasalukuyang benepisyong ibinibigay ng GSIS, na imumultiplikado sa isang adjustment factor.

Layunin nitong gawing pantay-pantay ang tinatanggap ng lahat ng retirado anuman ang petsa ng kanilang pagreretiro.

Binigyang-diin ni Villar ang moral na obligasyon ng estado na kilalanin ang naging sakripisyo ng mga diplomat. “Imagine an Ambassador who has spent decades representing our country… struggling to make ends meet for their daily and medical needs,” aniya.

Bukod sa mga nabubuhay pang retirado, may probisyon din sa batas para sa pamilya ng mga yumaong DFA retirees. Ang mga asawa na hindi na muling nag-asawa at mga kwalipikadong anak ay makatatanggap ng 50% ng pension differential.

“This provision aims to provide financial support to the family members of deceased retirees,” dagdag pa niya.

Matagal nang isinusulong ng mga retiradong DFA personnel ang patas na benepisyo, lalo na sa harap ng tumataas na gastusing medikal at pang-araw-araw.

Ang paggamit ng pondo mula sa consular fees sa halip na sa pambansang badyet ay kinilala ng mga fiscal watchdog bilang isang praktikal at responsableng hakbang.

“We are not just approving an increase in retirement benefits,” ani Villar. “We are sending a powerful message that their service, sacrifice, and dedication to our country are valued and remembered.”

Sa kabuuan, ipinapakita ng RA 12181 na maaaring tugunan ang mga pangangailangan ng mga lingkod-bayan na matagal nang nagretiro, nang hindi dinaragdagan ang pasanin sa taumbayan—isang anyo ng makatao at maingat na pamamahala.