NANAWAGAN ang mga awtoridad sa mga residente ng La Castellana, Negros Occidental, lalo na sa mga nakatira malapit sa mga daluyan ng tubig at mabababang lugar, na manatiling alerto matapos ang pagguho ng putik na tumama sa highway sa Barangay Biak-na-Bato, malapit sa paanan ng Bulkang Kanlaon.

“Mag-ingat nang higit at manatiling mapagmatyag sa posibilidad ng karagdagang pagbaha o pagdaloy ng lahar. Ang kaligtasan ng publiko ang nananatiling pangunahing prayoridad,” ayon sa pahayag ng Office of Civil Defense 6 (Western Visayas) noong Sabado.

Ayon sa naturang abiso, hindi madaanan ang kalsada sa Sitio Tamburong, Barangay Biak-na-Bato dahil sa pagbaha at pagguho ng putik na dulot ng ilang araw na tuloy-tuloy na pag-ulan.

“Pinalala pa ang sitwasyon ng naipong abo ng bulkan, bunga ng mga pagbuga ng abo at ilang bahagyang hanggang katamtamang pagsabog ng Bulkang Kanlaon simula noong nakaraang taon,” dagdag pa nila.

Bilang pag-iingat sa biyahe, pinayuhan ng OCD ang mga motorista na gumamit ng alternatibong ruta at iwasan ang apektadong lugar.

Ibinahaging mga larawan ng mga netizen ang nagpapakita ng mga delivery truck na nahihirapang dumaan sa makapal na putik.

Sa isang hiwalay na abiso, sinabi ng La Castellana Incident Management Team na,

“Dahil sa malakas na pag-ulan sa Barangay Biak-na-Bato noong Biyernes ng gabi, bumuhos ang nakaimbak na lahar mula sa Bulkang Kanlaon papunta sa Tulay ng Tamburong.”

“Dahil dito, pansamantalang hindi madaanan ng mga pasahero ang kalsada sa Barangay Biak-na-Bato,” dagdag pa nila.

Bandang pasado tanghali ng Sabado, nagsimula na ang clearing operation sa apektadong bahagi ng kalsada.

Ayon kay Remuel Seladan Lajo, Municipal Information Officer, maaaring dumaan muna ang mga commuter sa Barangay Cabacungan habang isinasagawa ang paglilinis sa pangunahing kalsada.

Dagdag pa niya, ang Department of Public Works and Highways (DPWH), Bureau of Fire Protection (BFP), Philippine Red Cross, at iba pang local government units ay nagbibigay rin ng tulong sa pamahalaang bayan ng La Castellana.

Ang Bulkang Kanlaon ay nananatili sa Alert Level 3, o nagpapakita ng mga palatandaan ng magmatic unrest (pagkilos ng magma). Philippine News Agency