NANAWAGAN si Senador Sherwin Gatchalian sa Department of Energy (DOE) at Energy Regulatory Commission (ERC) na agad na tugunan ang mga problema sa kuryente sa bansa, partikular ang matagal nang krisis sa elektrisidad sa Siquijor at ang mababang performance ng ilang power generation companies.

Ayon sa kanya, ang nararanasang krisis sa Siquijor ay isang “prolonged and severe power crisis” na labis nang nakaapekto sa mga pangunahing serbisyo at kabuhayan ng mga residente sa loob ng halos isang buwan.

Dahil dito, iginiit niyang dapat magpatupad agad ang DOE ng mga solusyon, kabilang ang pag-secure ng karagdagang suplay ng kuryente at ang pagbibigay ng malinaw at agarang timeline para sa ganap na pagpapanumbalik ng serbisyo.

Binigyang-diin din ng senador ang pananagutan ng mga electric cooperative sa lugar.

Aniya, “Kailangan ding panagutin ng DOE ang mga electric cooperatives na hindi nakakapagtaguyod ng kanilang responsibilidad na makapagbigay ng sapat na suplay ng kuryente sa Siquijor.”

Sa hiwalay na isyu, pinaboran ni Gatchalian ang hakbang ng ERC na sitahin ang 22 kumpanya ng power generation na nabigong mag-operate sa kanilang buong kapasidad.

Ipinahayag niyang kailangan ng mga kumpanyang ito na magsumite ng mga konkretong plano upang ayusin ang kanilang operasyon, kabilang ang paghahanda para sa mga hindi inaasahang aberya.

Iminungkahi rin niya ang patuloy na pamumuhunan sa maintenance ng mga planta at mga pag-upgrade sa sistema.

“Dapat tiyakin ng gobyerno na nakakapagbigay ng matatag, maasahan, at abot-kayang suplay ng kuryente ang mga gencos at iba pang stakeholders sa sektor ng enerhiya,” dagdag pa niya.

Sa kabuuan, nanawagan si Gatchalian ng mas mahigpit na pangangasiwa at pananagutan sa sektor ng enerhiya, upang masiguro ang maayos, sapat, at abot-kayang suplay ng kuryente sa lahat ng bahagi ng bansa.