SA loob lamang ng siyam na buwan mula nang i-take over ang electric service sa Central Negros, malawakang pagbabago sa imprastraktura at kalidad na serbisyo ang agad na naipatupad ng Negros Electric and Power Corporation (Negros Power).

Inilatag ni Negros Power President at Chief Executive Officer Roel Castro ang comprehensive report na nagdedetalye ng mga nagawa nang proyekto mula nang magsimula ang kanilang operasyon noong Agosto 2024.

“From day one, our goal has been to modernize the system, restore public confidence, and extend reliable, responsive electric service to all. The progress we’ve made is just the beginning of a broader transformation,” ani Castro.

Ilan sa naisagawa na ng Negros Power ay kumpletong rehabilitasyon ng Alijis Substation at 30-kilometer Bacolod–Silay 69kV subtransmission line kung saan pinalitan ang mga poste at electric line.

Naglagay din ng Automatic Circuit Reclosers, Load Break at Disconnect Switches, pati na rin ng rubber inserts upang hindi mapasok ng mga hayop.

Naglagay din ng mga energy-efficient na distribution transformers at pinalakas ang kampanya laban sa anti-electricity pilferage.

Libo-libong mga digital electric meters ang ipinalit sa mga kabahayan nang walang dagdag singil, gayundin ay naglagay ng mahigit sa 100 payment centers upang maging mabilis ang pagbabayad.

Pinabilis ang proseso ng aplikasyon ng kuryente at 24/7 ang customer service team na maaaring mahingan ng tulong o impormasyon.

Ayon kay Castro, isa sa kanilang malaking tagumpay sa nakalipas na siyam na buwan ay ang pagbibigay ng kuryente sa mga lugar na wala pang suplay sa ilalim ng Sitio Electrification Program.

“No one should be left in the dark. The Sitio Electrification Program is about progress and inclusion. We did it in 17 sitios and invested nearly 26 million pesos, benefiting 1,671 households,” paliwanag ni Castro.

Patuloy pa ang modernisasyon na gagawin ng Negros Power kasama na rito ang paglalagay ng centralized control center, Supervisory Control and Data Acquisition (SCADA) systems, paggamit ng drones para sa aerial surveys, thermal scanning at Geographic Information System (GIS) para sa asset mapping.

Nilinaw ni Castro na bagama’t mayroong mga bagong imprastraktura ay nananatili pa rin na “affordable” ang singil sa kuryente ng Negros Power.

Pinuri naman ng mga business groups ang malaking pagbabago na ginawa ng Negros Power.

Sinabi ni Wennie Sancho, presidente ng Alliance of Concerned Consumers in Electricity and Social Services (ACCESS), na matagal na taong nagtiis sa palyadong electric supply ang mga residente ng Negros, na ngayon ay isa-isa nang sinosolusyunan ng Negros Power.

Kumpiyansa naman si Frank Carbon ng Bacolod Chamber of Commerce and Industry na kasunod na ang economic growth ng rehiyon bunsod ng maaasahang suplay ng kuryente.

“Stable and modern power is essential to economic growth. The direction Negros Power is taking is exactly what Bacolod and the rest of Central Negros needs,” ani Carbon.

Tiniyak ng Negros Power na tuloy-tuloy pa ang pag-invest nila ng malaking halaga hanggang sa tuluyang maisaayos ang serbisyo sa buong Central Negros sa loob ng susunod na apat na taon.

“The journey has just begun. We owe it to our consumers to deliver reliable, accessible, and affordable electricity for years to come. We are asking for the patience and understanding of consumers as we need four more years for consumers to feel the improvements of our full rehabilitation and modernization plan,” pagtatapos ni Castro.