DALAWANG vintage bombs at isang granada ang nahukay ng mga construction workers sa compound ng University of the Philippines College of Medicine sa Pedro Gil St., Ermita, Manila noong Lunes.

Ayon kay Jomar Seriza, 35, isa sa mga obrero, bandang alas-8:00 ng umaga nahukay ang mga vintage bombs at granada sa ginagawang septic tank sa lugar.

Itinawag sa Ermita police station 5 ang nakitang mga bomba at nagresponde ang mga pulis na pinamunuan ni Police Corporal Fermin Vincent Manango.

Kinordon ang area at itinawag sa mga operatiba ng MPD-Explosive Ordnance Division at ng Regional Explosive Canine Unit ng NCRPO

Napag-alaman na 75 mm projectile at isang type 97 Japanese Hand Grenade (HE) ang nahukay.