ISA sa pinakamalinaw na pamana ng 19th Congress ay ang papel ng House of Representatives bilang matatag at maaasahang katuwang ni Pangulong Ferdinand R. Marcos Jr. sa laban kontra mahal na bilihin—lalo na ang bigas.

Sa panahon ni dating Speaker Ferdinand Martin G. Romualdez, ipinakita ng Kamara ang uri ng liderato na tahimik ngunit epektibo: hindi paingay, hindi pa-press release, kundi trabaho sa mga komite at paghimay sa problema kung saan ito nagsisimula. Sa gitna ng tumataas na presyo ng bilihin, nanindigan ang House bilang katuwang ni Pangulong Marcos sa paghahanap ng solusyon—hindi sa pamamagitan ng sisihan, kundi sa pamamagitan ng kongkretong hakbang.

Dito pumasok ang Murang Pagkain Supercommittee o Quinta Comm—isang bihirang halimbawa ng koordinadong aksyon ng limang mahahalagang komite ng Kamara. Sa ilalim ng House Resolution No. 254, pinagsama ang Ways and Means, Trade and Industry, Agriculture and Food, Social Services, at Food Security upang tutukan ang ugat ng problema: smuggling, hoarding, price manipulation, at gutom.

Hindi ito pangkaraniwang pagdinig. Ang mga hearing ng Quinta Comm ay razor-focused, malinaw ang direksyon, at may layuning magbunga ng agarang ginhawa sa mamamayan. Sa mga pagdinig na ito, binuksan ang galaw ng merkado ng bigas, inusisa ang papel ng kartel, at tinukoy ang mga butas sa sistema na matagal nang pinapasan ng konsyumer at magsasaka.

May mga resulta. Ang pagbebenta ng NFA rice sa presyong P35 kada kilo—at maging P33 sa ilang lugar—ay patunay na kapag may malinaw na direksyon ang pamahalaan at may Kongresong handang tumulong, nararamdaman ng ordinaryong Pilipino ang epekto. Hindi ito aksidente. Bunga ito ng seryosong oversight at tuloy-tuloy na pressure sa mga ahensiya at sa merkado.

Mahalaga ring banggitin ang pagpasa ng Anti-Agricultural Economic Sabotage Act, na nagbigay ng mas matitinding sandata laban sa hoarding, price manipulation, at kartel. Ito ay malinaw na mensahe ng 19th Congress: hindi na palalampasin ang mga nagpapayaman habang naghihirap ang konsyumer at magsasaka.

Gayunman, malinaw rin ang paninindigan ng Quinta Comm: ang importasyon ay pansamantalang lunas, hindi pangmatagalang sagot. Ang tunay na solusyon ay nasa pagpapalakas ng lokal na produksyon—isang balanseng lapit na binibigyang-halaga ang kapakanan ng konsyumer at ang dignidad ng magsasaka.

Sa kabuuan, ang Quinta Comm ay hindi lamang komite. Isa itong patunay na kapag ang Kongreso at ang Pangulo ay nagkakaisa sa layunin, may napapala ang taumbayan. Sa panahon ng pamumuno ni Speaker Romualdez, ipinakita ng House na kaya nitong maging katuwang ng ehekutibo—hindi sunud-sunuran, kundi responsable; hindi maingay, kundi epektibo.

Sa 19th Congress, ang laban para sa murang bigas ay hindi nanatili sa mga talumpati. Ito ay isinabuhay sa mga pagdinig, batas, at konkretong aksyon. At para sa milyun-milyong Pilipinong araw-araw bumibili ng bigas, iyon ang tunay na sukatan ng tagumpay.