MAGPAPATULOY ang mga pagdinig ng House committee on justice sa impeachment complaints laban kay Vice President Sara Duterte sa kabila ng petisyong inihain sa Supreme Court, sa gitna ng lumalawak na suporta ng mga miyembro at patuloy na pangangalap ng karagdagang ebidensiya, ayon kay San Juan City Rep. Ysabel Maria Zamora, ang vice chair ng komite.

Sa isang panayam sa ANC Headstart nitong Lunes, sinabi ni Zamora na inaasahan na ang naturang hamong legal at hindi nito mapuputol ang prosesong itinatakda ng Konstitusyon.

“Well, of course, we expected that, and we felt that they were going to file a petition before the Supreme Court. I mean, she (Duterte) has her lawyers, and it is just natural for the lawyers to exhaust all remedies available to them,” ani Zamora.

Ang petisyon, na inihain ng mga abogadong may kaugnayan sa pamilyang Duterte, ay nag-aakusa ng grave abuse of discretion sa panig ng Kamara de Representantes sa pagsasagawa ng impeachment proceedings at humihiling na ipahinto ang mga pagdinig.

Ngunit sinabi ni Zamora na magpapatuloy ang justice panel alinsunod sa 1987 Konstitusyon at sa mga patakaran ng Kamara.

“Well, what will happen next is the continuation of the proceedings before the Committee on Justice, where we will have a hearing, as stated under the Constitution and as stated in the rules of impeachment of the House of Representatives. So, we will proceed with a hearing,” saad niya.

Ipinahayag ni Zamora na nakikita nitong may sapat na suporta sa loob ng Kamara upang isulong ang kaso ng impeachment, batay sa mga naging pag-uusap sa mga kasamahan, ngunit binigyang-diin na nagpapatuloy pa ang proseso at ang ebidensiya ang mapapasya.

“Of course, we will follow the rules on impeachment proceedings, and we will still have to determine probable cause as stated in our rules. And maybe for the understanding of others, what we are doing right now is akin to a preliminary investigation in criminal cases,” sinabi niya.

“So while, again, we said that it appears that we have the numbers, we still have to go through the process, we still have to vet documents, verify the authenticity of these documents, especially those attached to the complaint and to the answer, if ever,” dagdag ni Zamora.

Sinimulan ng justice committee ang mga pagdinig noong Marso 25 matapos matukoy na sapat sa anyo, nilalaman at batayan ang dalawang natitirang reklamong impeachment laban kay Duterte.

Kasalukuyan nitong tinutukoy ang probable cause, ang huling hakbang bago maipadala ang kaso sa Senado para sa paglilitis, na may mga pagdinig na itinakda sa Abril 14, 22 at 29.

Pinahintulutan ng House plenary ang komite na ipagpatuloy ang mga pagdinig kahit sa panahon ng congressional recess mula Marso 21 hanggang Mayo 3, na nagbibigay-daan upang maglabas ng mga subpoena at mangalap ng ebidensiya.

Ang kasalukuyang mga reklamo sa impeachment ay inihain matapos ipawalang-bisa ng Korte Suprema ang kaso ng impeachment noong nakaraang taon dahil sa mga procedural na dahilan kaugnay ng one-year bar rule, habang pinahintulutan ang paghahain ng mga bagong reklamo simula Pebrero 2026.

Kabilang sa mga paratang ang umano’y maling paggamit ng confidential funds, hindi maipaliwanag o pinaghihinalaang ill-gotten wealth, mga diumano’y banta laban sa Pangulo at iba pang opisyal, posibleng mga pagkukulang o hindi pagkakatugma sa Statements of Assets, Liabilities and Net Worth, at panunuhol.

Kapag napatunayan ang probable cause at hindi bababa sa isang-katlo ng mga miyembro ng Kamara ang bumoto ng pabor, ipapadala ang articles of impeachment sa Senado, na magtitipon bilang impeachment court upang dinggin ang kaso.