MAS lalong bumigat ang responsibilidad ng House Committee on Justice matapos ipakita ng isang bagong survey na 88 porsiyento ng mga Pilipino ang nais na humarap si Bise Presidente Sara Z. Duterte sa isang impeachment trial sa Senado. Ayon kay Deputy Speaker Paolo Ortega V ng La Union nitong Biyernes, sumasalamin ito sa isang publikong hindi na kuntento sa pag-iwas at dramang palabas lamang.

Si Ortega, isa sa mga naghain ng ikaapat na impeachment complaint, ay nagsabing inilalantad ng Tangere survey ang isang realidad sa pulitika na hindi na maaaring ipagsawalang-bahala.

Aniya, kapag halos siyam sa bawat sampung Pilipino ang humihiling ng pormal na paglilitis, hindi na ito boses lamang ng mga kritiko kundi ng mas malawak na publiko na naghahanap ng sagot sa tamang forum.

“Kapag 88 percent na ng mga Pilipino ang nagsasabing humarap ka sa impeachment trial, hindi na iyan simpleng opinyon lang ng iilan. Hatol na iyan ng public conscience na sawa na sa palusot, sawa na sa pa-victim at sawa na sa style na laging may script pero walang sagot,” pahayag ni Ortega.

Binigyang-diin niya na mas naging mahalaga ang trabaho ng komite dahil ito ang nagsisilbing tulay sa pagitan ng panawagan ng publiko at ng prosesong konstitusyonal na maaaring magdala ng kaso sa Senado.

“Mas mabigat ngayon ang tungkulin ng Justice Committee dahil hindi na kami basta nakikinig sa reklamo. Ang nasa harap namin ngayon ay malinaw na sigaw ng taumbayan na gusto nang matapos ang lokohan at gusto nang makita kung may maipapakitang totoong depensa ang Bise Presidente,” dagdag niya.

Ayon sa Tangere survey, 88 porsiyento ng mga respondent ang naniniwalang dapat sagutin ni Duterte ang mga alegasyon laban sa kanya sa isang pormal na paglilitis sa Senado, na itinuturing nilang tamang lugar para maipagtanggol niya ang sarili sa publiko.

Para kay Ortega, mahalaga ang natuklasang ito dahil pinapahina nito ang argumento na ang impeachment ay simpleng pulitikal na pag-uusig lamang. Sa halip, ipinapakita raw nito na karamihan sa mga Pilipino ay nakikita ang paglilitis bilang isang mahalagang demokratikong pananagutan.

“Hindi puwedeng lagi na lang ang drama ay nasa labas at ang accountability ay laging absent. Kung totoo ang sinasabi niyang malinis siya, bakit tila allergic siya sa forum na may oath, may records at may paglilinaw?”

Sinabi rin niya na ipinapakita ng survey ang pagod na publikong sawa na sa aniya’y mga dramatikong pag-iwas tuwing napupunta ang usapan sa mga dokumento, confidential funds, at mga financial record.

“Ang problema kay VP Duterte, sa tuwing sumisikip ang usapan at humihingi ng konkretong paliwanag, biglang may press release, biglang may victim card, biglang may sermon. Parang ang akala niya madadaan sa lakas ng boses ang butas sa ebidensiya,” ani Ortega.

“Hindi kami puwedeng magbulag-bulagan habang ang publiko mismo ang nagsasabing ituloy ang paglilitis. Kapag ganyan kalaki ang demand for accountability, ang mas nakakahiya ay kung ang isang opisyal ay mas masipag pang magpaawa kaysa magpaliwanag,” dagdag pa niya.

Idinagdag ni Ortega na dapat magsilbing babala ang survey sa kampo ni Duterte na maaaring hindi na umuubra ang dating estilo ng paggawa ng bawat isyu bilang isang palabas sa pulitika, lalo na sa harap ng publikong mas naghahanap na ngayon ng mas mahihirap at disiplinadong sagot.

“May panahon na uubra ang tapang-tapangan at may panahon na uubra ang puro parinig. Pero kapag umabot ka na sa puntong halos buong bansa ang gustong marinig ang sagot mo sa Senado, hindi na iyan simpleng PR problem. Krisis na iyan ng credibility,” aniya.

“Kung ang isang pinuno ay tunay na may dangal at may paninindigan, hindi siya nagtatago sa likod ng indignation habang ang taumbayan ay naghihintay ng tuwid na sagot,” sabi pa ni Ortega.

“Sa totoo lang, ito na ang pinakamalinaw na mensahe sa kanya: sapat na ang yabang, sapat na ang drama, sapat na ang pag-iwas. Humarap ka, sumagot ka, at patunayan mo sa tamang forum kung may maipapakita kang matibay na depensa bukod sa press release,” pagtatapos ni Ortega.