ANG Kagawaran ng Agrikultura, sa pamumuno ni Kalihim Francisco Tiu Laurel Jr., ay gumagawa ng tamang hakbang upang maprotektahan ang mga lokal na prodyuser ng pagkain at mga mamimili laban sa mga epekto ng ekonomiya dulot ng kasalukuyang sigalot sa Middle East, kabilang ang pagtaas ng presyo ng langis.

Sa kanyang pagsasalita sa Kapihan ng Samahang Plaridel sa Rizal Park Hotel, sinabi ni Agriculture Assistant Secretary Arnel V. De Mesa na pinapabilis ng ahensya ang pamamahagi ng fuel subsidy sa mga magsasaka at mangingisdang lubhang naapektuhan ng pagtaas ng presyo ng langis, na nagdudulot din ng pagtaas sa gastos sa pataba at transportasyon.

“Ayon sa utos ni Pangulong Marcos at ni Sec. Laurel, ginagawa ng DA ang mga kinakailangang hakbang upang matulungan ang ating mga magsasaka at mangingisda na apektado ng krisis sa Middle East,” ani Laurel sa programang pang-serbisyong publiko na suportado ng PAGCOR, PCSO, at ni Manila Mayor Francisco “Isko” Domagoso Moreno.

“Sa aming talaan mula nang magsimula kaming magbigay ng fuel subsidy, mahigit 100,000 indibidwal na ang nakatanggap. At patuloy pa itong madaragdagan habang nagpapatuloy ang programa,” dagdag ni De Mesa.

Iginiit din ni De Mesa na hindi lamang fuel subsidy ang tulong na ibinibigay ng DA.

“Sa Benguet, kung saan maraming biyahero ang tumigil o nagbawas ng biyahe dahil sa pagtaas ng gastos sa krudo, nagpadala ang DA ng mahigit 38 Kadiwa trucks upang bilhin ang kanilang mga produkto. Nagkaroon din ng mga trade fair sa tulong ng ating mga regional offices,” paliwanag niya.

“Hinihikayat din namin ngayon ang mga lokal na pamahalaan na suportahan ang programang ‘Sagip Saka,’ kung saan maaari silang direktang bumili mula sa mga lehitimong organisasyon ng mga magsasaka.”

Isa pang napapanahong tulong ng pamahalaan ay ang exemption sa bayad sa toll.

“Noon ay toll rebate lang. Ngayon ay toll-free na. Maaaring dumaan at bumiyahe ang ating mga accredited na trucker ng DA sa mga toll gate gaya ng SLEX, NLEX, SCTEX, at iba pa nang walang binabayaran. Malaking tipid ito para sa lahat.”

Tungkol naman sa paparating na El Niño, sinabi ni De Mesa na mahigpit na nakikipag-ugnayan ang DA sa iba pang ahensya ng gobyerno upang matulungan ang mga magsasaka at mangingisda na makayanan ang epekto nito.

“Nag-anunsyo na ang PAGASA ng nalalapit na El Niño, kaya ngayon pa lang ay naghahanda na tayo kasama ang ibang ahensya ng gobyerno,” aniya.

Dagdag pa niya, isinasaalang-alang din ng DA ang pag-aayos ng iskedyul ng pagtatanim at paglipat sa mga pananim na hindi nangangailangan ng maraming tubig upang masiguro ang sapat na suplay ng pagkain kahit sa panahon ng El Niño.

“Gaya ng sinabi ko, sapat ang ating imbentaryo ng mga pangunahing bilihin. Ngunit patuloy pa rin ang ating paghahanda,” aniya.

Ipinagmalaki rin ng opisyal ng DA ang isinusulong na solar-powered irrigation system ng pamahalaan.

“Malaki ang maitutulong nito, lalo na’t inaasahan naming ganap itong magiging operasyonal bago matapos ang taon.”