HINIMOK noong Linggo ni House Majority Leader Ferdinand Alexander “Sandro” A. Marcos ng Ilocos Norte ang kanyang mga kasamahan sa House of Representatives na pabilisin ang pag-apruba ng panukalang Kalinga Act, na aniya’y magbibigay ng ginhawa sa mahihirap na Pilipino, gitnang uri, at maliliit na negosyante sa gitna ng tumataas na gastusin.

Ayon kay Marcos, layunin ng panukala na matiyak na handa at awtomatikong maipatutupad ang tulong ng pamahalaan sa panahon ng mga krisis tulad ng pagtaas ng presyo ng langis at implasyon.

“Ito ay tungkol sa pagprotekta sa bawat Pilipino—mula sa pinakamahihirap na pamilya, hanggang sa gitnang uri, hanggang sa maliliit na negosyanteng nagsisikap manatiling matatag,” ani Marcos.

Sa gitna ng patuloy na tensyon sa Gitnang Silangan na nagtutulak sa pagtaas ng pandaigdigang presyo ng langis, pinangunahan nina Speaker Faustino “Bojie” G. Dy III at Marcos ang paghahain ng House Bill (HB) No. 8834, o ang Kalinga Act, na naglalayong gawing institusyon ang isang pambansang sistema ng proteksyon upang matiyak na hindi papasanin ng mga Pilipino ang buong bigat ng panibagong krisis na dulot ng pagtaas ng presyo ng langis.

Ang Kalinga Act ay isang panukalang idinisenyo upang matiyak ang mabilis, target, at awtomatikong tugon ng pamahalaan kapag nagsimulang magdulot ng pagtaas sa gastusin ang pag-akyat ng presyo ng langis.

Higit pa sa isang pansamantalang ayuda, itinatatag ng Kalinga Act ang isang pambansang balangkas ng proteksyon na magbibigay-daan sa pamahalaan na kumilos nang maaga, tiyak, at koordinado—bago pa lumala ang pagtaas ng presyo ng langis tungo sa malawakang pagtaas ng pamasahe, presyo ng pagkain, kuryente, at iba pang pang-araw-araw na gastusin.

Binanggit ni Marcos na inaasahang maaaprubahan ang ulat ng komite sa muling pagbubukas ng sesyon, na magbibigay-daan sa deliberasyon sa plenaryo.

“Itinutulak namin ito na maisulong sa lalong madaling panahon upang mailagay ang tunay na proteksyon,” dagdag ni Marcos.

Sa panahon ng break, ang 13-panel Legislative Energy Action and Development (LEAD) ng Kamara, na pinamumunuan ng Committee on Ways and Means na pinangungunahan ni Marikina Rep. Miro Quimbo, ay nagsagawa ng serye ng mga pagdinig at ngayon ay pumapasok na sa mas mahalagang yugto, habang isinasalin ng mga mambabatas ang mga testimonya, alalahanin ng iba’t ibang sektor, at mga rekomendasyon ng mga ahensya tungo sa tinukoy ni Quimbo na pinagsamang panukalang Kalinga bill.

Binigyang-diin ni Marcos na ang panukala ay nakabatay sa tungkulin ng pamahalaan na protektahan ang kabuhayan, patatagin ang presyo, at tiyakin na walang Pilipinong maiiwan sa panahon ng krisis.

“Sa panahon ng krisis, dapat malinaw: ang gobyerno ay kakampi ng bawat Pilipino. Walang maiiwan, at walang pababayaan,” aniya.

Idinagdag pa niya na mahalaga ang pagpapalakas sa kakayahan ng bansa na mabilis tumugon sa mga dagok ng ekonomiya upang mapanatili ang kapakanan ng pamilya at katatagan ng ekonomiya.

“Kapag matatag ang pamilya at negosyo, matatag ang bansa. Iyon ang layunin ng panukalang ito,” ani Marcos.

“Hindi na dapat naghahabol ang gobyerno kapag may krisis. Dapat nakaabang na ang tulong,” dagdag pa niya.