ANG paulit-ulit na pagliban ni Bise Presidente Sara Z. Duterte ay naging isa sa mga malinaw na larawan ng mga pagdinig ng House Committee on Justice, habang kumilos ang komite noong Lunes upang pinal na buuin ang ulat at Articles of Impeachment matapos makakita ng probable cause.

Inilahad ito ni Batangas Rep. Gerville “Jinky Bitrics” Luistro, chair ng Justice Committee, sa kanyang pambungad na pahayag noong Mayo 4—ang huling pagdinig ng komite bago isumite ang ulat at Articles of Impeachment sa plenaryo.

“Sa gitna ng lahat ng ebidensyang ito, sa kabila ng lahat ng diskusyon natin, may isang bagay na hindi nagbago: Ang upuan. Isang bakanteng upuan,” ani Luistro, na isang abogado.

“Sa bawat ebidensya, walang direktang sagot. Sa bawat tanong, walang paliwanag,” dagdag niya.

Ayon kay Luistro, hinintay ng komite na humarap si Duterte sa ilalim ng panunumpa, ngunit nagpatuloy ang mga pagdinig na ang tanging kaharap ng mga ebidensya mula sa mga resource person ay ang kanyang kawalan.

“Naghintay tayo ng salaysay mula sa Bise Presidente sa ilalim ng panunumpa, pero ang tanging humarap sa atin ay ang katahimikan ng isang bakanteng upuan,” paliwanag ni Luistro.

Ang pahayag ay kasunod ng ilang linggong pagdinig kung saan tinalakay ang mga paratang hinggil sa confidential funds, kuwestiyonableng mga resibo, hindi maipaliwanag na yaman, mga rekord ng AMLC, mga dokumento ng SEC, at umano’y mga pagbabanta.

Sinabi ni Luistro na umabot na sa punto ang komite na hindi na makatutulong ang pagpapalawig pa ng proseso.

“Noong April 29, the Committee on Justice decided that we have seen enough,” aniya.

“Hindi na kailangang pahabain pa. Hindi na kailangang bigyan pa ng isa pang pagkakataon ang isang taong tumatangging dumalo,” dagdag niya.

Binanggit din niya ang sinabi ni Akbayan Party-list Rep. Perci Cendaña upang ilarawan ang desisyon ng komite na huwag nang maghintay pa kay Duterte.

“Sabi nga ni Cong. Perci Cendaña, ‘Hindi na kailangan ng make-up class ang laging nag-cu-cutting class,’” ani Luistro.

Ayon kay Luistro, nagkakaisang naabot ng komite ang konklusyon matapos suriin at timbangin ang mga ebidensya.

“Sa nagkakaisang boto, natukoy ng komiteng ito ang probable cause upang i-impeach si Bise Presidente Sara Z. Duterte dahil sa culpable violation of the Constitution, bribery, graft and corruption, iba pang mabibigat na krimen, at pagtataksil sa tiwala ng publiko,” pahayag niya.

Aniya, layunin ng pagdinig noong Mayo 4 na pagtibayin ang mga naunang natukoy ng komite at ilagay ang mga ito sa pormal na dokumento.

“Ngayon, May 4, kukumpirmahin natin ang mga nangyari noong nakaraan sa pamamagitan ng isang Committee Report,” ani Luistro.

“Kaya narito tayo upang pinal na buuin ang Committee Report at pagkatapos nito, ang Articles of Impeachment,” dagdag niya.

Sinabi rin ng chair ng Justice panel na ang susunod na gawain ng komite ay aprubahan ang mga dokumento at ipadala ang kaso sa buong Kamara.

“Ang ating tungkulin ay aprubahan ang mga dokumentong ito at isumite ang lahat sa Plenary,” ani Luistro.