NANAWAGAN si Senate President Vicente C. Sotto III ng pagkakaisa, kooperasyon at paghahanda sa Senado habang sinabi niyang ramdam ng mga Pilipino ang epekto ng pagtaas ng presyo ng pangunahing bilihin at fuel.

Ginawa ni Sotto ang panawagan habang pinangungunahan ang flag ceremony sa Senado nitong Lunes, Mayo 4, kung saan sinabi niyang dapat makatulong ang kapulungan sa pagpapagaan ng pasanin ng publiko habang naghahanda sa mga tungkulin ng institusyon.

“We can feel this in the rising prices of goods and fuel. I hope that the Senate can help ease its impact on each and every one of us,” ani Sotto.

Kinilala rin niya na humaharap sa mga hamon ang Senado at humingi ng suporta para sa mga paghahanda at karagdagang tungkuling kailangan upang maisakatuparan ang mandato nito sa ilalim ng Konstitusyon.

“Here in the Senate, we are also facing challenges. I count on your unity and support for the necessary preparations and additional responsibilities so that we can fulfill and carry out the mandate of our Constitution,” dagdag niya.

Sinabi ni Sotto na kailangan ang pagtutulungan sa loob ng institusyon upang makabuo ng epektibo, handa, maaasahan at mapagkakatiwalaang Senado.

Ang kanyang pahayag ay ginawa kasabay ng pagbabalik ng trabaho sa Senado matapos ang isang buwang recess, kung saan inaasahang tatalakayin ng mga mambabatas ang priority measures sa governance, economic policy, social welfare, energy, agriculture at infrastructure.

Inaasahan ding maghahanda ang Senado para sa posibleng karagdagang tungkulin sa ilalim ng Konstitusyon kung pormal na maipadala sa kapulungan ang Articles of Impeachment laban kay Vice President Sara Duterte-Carpio.

Nauna nang sinabi ni Sotto na kikilos ang Senado alinsunod sa constitutional procedure kapag natanggap na ang articles.