KINUWESTYON ni House impeachment trial spokesperson at kinatawan ng Lanao del Sur na si Zia Alonto Adiong nitong Biyernes ang paulit-ulit na pahayag ni Sara Z. Duterte na handa siyang harapin ang mga paglilitis sa impeachment, dahil ayon sa kanya ay hindi pa rin direktang sinasagot ng depensa ang mga alegasyong nakasaad sa Articles of Impeachment.

Ginawa ni Alonto Adiong ang pahayag matapos ang unang araw ng pre-trial conference ng impeachment court ng Senado, kung saan ipinagpatuloy ng kampo ng depensa ang paghahain ng mga pagtutol sa proseso ng impeachment at sa mga naging hakbang ng Mababang Kapulungan bago na-impeach si Duterte.

“Mas maganda sana if they’re really ready, sinasabi nila, we will answer,” ani Alonto Adiong sa isang panayam sa Memo ng Bilyonaryo News Channel.

Binanggit ng tagapagsalita ng Kamara na dati nang tumanggi ang kampo ni Duterte na lumahok sa mga pagdinig ng House Committee on Justice, dahil iginiit nilang sasagot sila sa tamang forum.

“Mula pa noong umpisa, noong confirmation hearings, hindi naman sila pumunta. Binigyan natin sila ng benefit of the doubt dahil sinabi nila na, ‘Okay, doon na lang kami sasagot sa proper forum,’” ani Alonto Adiong.

“Kaya pinili nilang huwag dumalo sa confirmation hearing at sa kabila nito, tiniyak pa rin natin ang pagsunod sa due process. Palagi nating hinihiling ang kanilang presensya ngunit hindi pa rin sila dumadalo.”

Ayon kay Alonto Adiong, matagal nang pinaninindigan ng House prosecution panel na ang mga pagdinig ng komite ay bahagi lamang ng prosesong konstitusyonal upang matukoy kung may sapat na batayan para iakyat ang reklamo sa paglilitis.

Ipinaliwanag niya na ang papel ng Justice Committee ay maihahambing sa isang preliminary investigation, kung saan kinakalap at sinusuri ang mga ebidensiya upang malaman kung dapat nang isulong ang mga kaso sa isang pormal na paglilitis.

Dagdag pa niya, nang tanggapin ng Senado ang hurisdiksiyon sa reklamong impeachment at magtipon bilang impeachment court, nalampasan na ng proseso ang usapin kung paano sinimulan ng Kamara ang kaso.

Aniya, ang nais nang marinig ng maraming Pilipino ngayon ay ang mga sagot sa mismong mga alegasyon.

“Ngayon na naman sa pre-trial, sinasabi nila na ready sila. Oo, nandoon sila pero wala ang Vice President. Nandoon ang kanyang depensa pero ang kasagutan na ninanais nating marinig mula sa kanila ay wala doon,” sabi ni Alonto Adiong.

Sinabi rin niya na ang kahilingan ng depensa na tuluyang ibasura ang kaso, kasabay ng kawalan ng malinaw na tugon sa mga alegasyon, ay natural na magbubunsod ng mga tanong mula sa publiko.

“Dalawa lamang ang maaaring maging konklusyon dito. Maaaring wala kayong sagot, o kaya naman ay iniiwasan ninyong magbigay ng mga sagot,” aniya.

Idinagdag ng mambabatas na ang mga naging hakbang ng depensa sa ngayon ay tila hindi naaayon sa kanilang mga pampublikong pahayag na handa silang harapin ang mga akusasyon laban kay Duterte.

“Bakit hindi ito ang ipinapakita ninyo kung talagang sinasabi ninyong handa kayo? Hindi nagtutugma ang inyong mga salita at ang mga aksiyong ipinapakita ninyo sa harap ng impeachment court,” pagtatapos ni Alonto Adiong.