IKINATUWA ni Quezon City 5th District Cong. Patrick Michael “PM” Vargas ang desisyon ng isang lokal na hukuman na ibasura ang P1 bilyong kasong sibil laban sa kanya.

Ayon kay Vargas, isa itong malaking tagumpay na nagpapakita na pulitika lamang ang motibo sa likod ng isinagawang kampanya ng paninira laban sa kanya.

Ang kaso, na isinampa noong Disyembre 2025 ni dating Konsehal ng Quezon City na si Atty. Antonio Enrile Inton Jr. sa ngalan ng United People’s Against Corruption (UPAC), ay ibinasura matapos mabigo ang nagsasakdal na magbayad ng kinakailangang filing fees sa korte. Pormal na inilabas ang kautusan ng Regional Trial Court (RTC) Branch 81 sa ilalim ni Presiding Judge Madonna Echiverri.

“Malugod naming tinatanggap ang desisyon ng korte. Sa simula pa lamang, buo na ang tiwala ng inyong lingkod na hindi uusad ang kasong ito dahil pawang gawa-gawa lamang ang mga akusasyon. Ginamit lamang nila ang korte upang sirain ang aking pangalan,” ani Vargas.

Sinabi rin ni Vargas na pinagtitibay ng naging pasya ng hukuman ang nauna nang pahayag ni Mayor Joy Belmonte na walang tinatawag na “ghost projects” sa Ikalimang Distrito.

“Tulad ng sinabi ko noon, isa lamang itong walang saysay na reklamo na isinampa ng isang disgrasyadong dating opisyal ng lungsod. Malinaw na ang layunin nito ay sirain ako gamit ang mga gawa-gawang paratang,” dagdag niya.

“Palagi naman tayong naging bukas at tapat sa ating mga ginagawa. May ilang grupo lamang na sadyang nais baluktutin ang tunay na kuwento,” ani pa ni Vargas.

Kinuwestiyon din ni Vargas ang motibong pampulitika ng mga nagsampa ng reklamo, na umano’y ginagamit ang paghahain ng mga kaso upang makakuha ng atensyon ng publiko at sirain ang reputasyon ng iba.

“Isa itong matinding pag-aaksaya sa oras at yaman ng ating sistemang panghukuman. Ang panahon ng hukuman ay dapat ilaan sa pagbibigay ng katarungan sa mga tunay na nangangailangan nito,” pahayag niya.

Nagpahayag din si Vargas ng pagkabahala dahil tila siya lamang ang pinupuntirya ng mga nagsampa ng reklamo, na aniya’y ginagamit ang kaso upang magbigay ng maling impresyon na siya ay may ginawang katiwalian. Nagbabala rin siya laban sa mga taong may kaugnayan sa kaso na umano’y ginagamit ang isang grupo ng relihiyon upang isulong ang paninira laban sa kanya.

“Nag-aalala po ako para sa ating mga kapatid mula sa religious sector na baka ginagamit lamang sila para sa layuning pampulitika at nailalayo sa katotohanan. Sana ay manatili silang mapanuri,” ani Vargas.

“Payapa at malinis ang ating distrito. Ngunit napansin natin na simula nang may ibang naghahangad maupo sa puwesto, na sinasabing may koneksyon sa mga sindikato, naging marumi na ang pulitika rito,” dagdag pa niya.

Sa kasalukuyan, nakikipagpulong si Vargas sa kanyang legal na koponan upang pag-usapan ang susunod nilang hakbang matapos maibasura ang kaso. Nangako rin siyang magsasampa ng kaukulang kaso laban sa mga patuloy na nagpapakalat ng maling impormasyon.

“Handa tayong magsampa ng kaso laban sa mga nagpapakalat ng kasinungalingan. Hindi tayo mapipigilan ng fake news sa ating patuloy na pagtatrabaho para sa ikabubuti ng ating distrito. Tuloy-tuloy lamang ang serbisyo para sa District 5,” pagtatapos ni Vargas.