IKINATUWA ni House Lead Prosecutor Gerville “Jinky Bitrics” Luistro ng Batangas noong Lunes ang unang araw ng impeachment trial sa Senado, at sinabi niyang ipinakita ng mga naganap na pagdinig na umuusad na ang prosesong pangkonstitusyon para sa pananagutan ng mga opisyal ng pamahalaan.

Sa isang press conference matapos ang unang araw ng paglilitis, sinabi ni Luistro: “Sa wakas ay nagsimula na ang ating impeachment trial. Nais naming ipahayag ang aming papuri sa impeachment court dahil tumugon ito sa mandato ng Konstitusyon.”

Ayon kay Luistro, mahalaga ang pagbubukas ng paglilitis dahil nagsimula na ang mekanismong itinakda ng Konstitusyon upang panagutin ang mga opisyal ng gobyerno.

“Isa itong tagumpay para sa sambayanang Pilipino dahil gumagana ang mekanismo ng pananagutan at nasusunod ang Konstitusyon,” aniya.

Binanggit din niya na kapwa naipahayag ng prosekusyon at depensa ang kanilang mga opening statement, gayundin ang kanilang mga tugon sa mga isyung tinalakay sa pre-trial conference.

“Ngayon ay naihain na ang opening statements ng prosekusyon at depensa, at natalakay na rin ang mga usaping lumitaw sa pre-trial conference,” ani Luistro.

Sinabi rin niya na sa Martes ay sisimulan na ang presentasyon ng mga ebidensya.

“At bukas, sa wakas, sisimulan na natin ang presentasyon ng ebidensya,” dagdag niya.

Ipinunto rin ni Luistro na kinilala ng impeachment court ang mungkahing pagkakasunod-sunod ng prosekusyon sa pagtalakay sa mga Articles of Impeachment.

Sa ilalim ng planong ito, unang ihaharap ng prosekusyon ang mga ebidensya kaugnay ng mga banta (threats).

“Bukas ay sisimulan natin ang presentasyon ng ebidensya para sa unang artikulong tatalakayin, at iyon ay ang tungkol sa mga banta,” ani Luistro.