KINUWESTIYON ng defense panel ni Vice President Sara Duterte ang batayan at saklaw imbestigasyon ng NBI sa Article IV ng kanyang impeachment case.

Nagpatuloy nitong Miyerkules ang Senate impeachment court na may 20 senador na dumalo. Idineklara ni Senate President Sherwin Gatchalian na may quorum bago pinangasiwaan ni Presiding Officer Francis Escudero ang paglilitis.

Ang kahilingan ng prosekusyon para sa subpoena duces tecum kaugnay ng tax documents ni Manases “Mans” Carpio at 22 negosyo kung saan umano may interes ang respondent ay natanggap ng Clerk of the Impeachment Court noong Hulyo 6 ng alas-3:35 ng hapon.

Natanggap din ng korte sa kaparehong petsa at oras ang hiwalay na renewed request para sa subpoena duces tecum sa bank records, na naka-address kay Bangko Sentral ng Pilipinas Governor Eli Remolona Jr. bilang chairman ng Anti-Money Laundering Council.

Nagpatuloy din ang presentasyon ng prosekusyon sa testimony ni NBI Cybercrime Division agent John Mark Calilung, na ipinatawag upang tumestigo sa paghawak at authentication ng mga video materyal na kaugnay ng mga umano’y pagbabanta ni Duterte laban kina President Ferdinand Marcos Jr., First Lady Liza Araneta-Marcos at dating House Speaker Martin Romualdez.

Sa cross-examination, kinuwestiyon ng defense counsel si Calilung tungkol sa kanyang training sa photo and video authentication kabilang ang dalawang linggong training niya mula sa MaxCorp InterVentures.

Kabilang sa mga puntong binanggit sa certification ang kawalan ng affidavits mula sa mga taong nag-record ng video, kawalan ng individual affidavits mula sa media representatives, at kawalan ng participation ng offended parties sa grave-threat complaint.

Kinilala ni Calilung na ibinalik ng DOJ sa NBI ang orihinal na affidavit of investigation at kalaunan ay nagsumite ang bureau ng revised affidavit of investigation na may petsang February 10, 2025.

Tinanong ng depensa kung sina Marcos, ang First Lady at Romualdez ay humarap sa NBI o nagsumite ng affidavits kaugnay ng umano’y banta.

Tumestigo si Calilung na hindi humarap sa NBI ang tatlo sa panahon ng imbestigasyon at hindi nakalakip ang kanilang affidavits sa affidavit of investigation ng bureau.

Sinabi rin niyang wala siyang personal knowledge kung naghain sina Marcos, ang First Lady o Romualdez ng criminal complaints laban kay Duterte kaugnay ng Nov. 23, 2024 online press conference.

“For this case, we complied with the requirements of the DOJ. That’s why we secured a second certification wherein our document is enough for preliminary investigation,” ani Calilung.

Nang tanungin kung ano ang ibig sabihin ng “motu proprio” kaugnay ng imbestigasyon, sinabi ni Calilung: “Even without a complainant, we started the investigation.”

Kinuwestiyon din ng depensa si Calilung tungkol sa kanyang personal knowledge sa Nov. 23 press conference.

Tumestigo siya na hindi siya participant sa press conference, hindi niya napanood ang livestream in real time, at nalaman lamang niya ang tungkol sa umano’y pagbabanta nang magsimula ang imbestigasyon kalaunan sa araw na iyon.

Sinabi rin ni Calilung na wala siyang personal knowledge tungkol sa taong umano’y tinukoy sa video.

Kalaunan ay nagpatugtog ang defense counsel ng ilang bahagi ng mas mahabang Nov. 23 video upang ipakita ang konteksto kaugnay ng isyu sa detention at transfer ni Atty. Zuleika Lopez, saka tinanong kung inimbestigahan ng NBI ang umano’y banta sa buhay ni Lopez.

Sinabi ni Calilung na hindi inimbestigahan ng NBI ang bagay na iyon dahil kailangan ng complaint para rito.

Kinuwestiyon din ng depensa ang katumpakan ng transcript ni Calilung ng Nov. 23 press conference, sa pamamagitan ng paghahambing ng ilang bahagi ng video sa kanyang affidavit of transcription.

Tumutol ang prosekusyon sa linyang ito ng pagtatanong, ngunit pinayagan ito ni Escudero bilang bahagi ng cross-examination upang subukin ang katumpakan at pagiging tapat ng transcript ng testigo.

Tumestigo rin si Calilung na, sa abot ng kanyang kaalaman, walang korte na humatol kay Duterte ng guilty sa grave threats o inciting to sedition kaugnay ng Nov. 23, 2024 press conference.

Sinabi ni Escudero na bibigyan ang depensa ng limang minuto at 18 segundo na naibigay sa prosekusyon matapos tutulan ang sagot ng isang abogado sa tanong ng senator-judge.

Sinabi ni Escudero na napanood at napakinggan na ng publiko ang proceeding dahil ito ay televised, kaya ang pinakapatas na hakbang ay bigyan ang depensa ng kaparehong pagkakataon.

Binalaan niya ang magkabilang panig na hindi na pahihintulutan ng korte ang kaparehong mahahabang pahayag ng counsel na naglalatag ng conclusions of fact and law sa halip na hayaan ang mga testigo na magharap ng ebidensya.

Sinabi ni Senator-Judge Alan Peter Cayetano na dapat iwasan ng mga senator-judge ang mga tanong na maaaring makaapekto sa pagiging patas ng paglilitis.

Sinabi naman ni Senator-Judge Pia Cayetano, na nauna nang naghain ng motion to strike sa pahayag ng prosekusyon, na inuurong niya ang motion sa interes ng fairness matapos bigyan ang depensa ng kaparehong pagkakataong sumagot.

Patuloy niyang tatawagin ang atensyon ng presiding officer kung sa tingin niya ay may nilalabag na rules.

Nagbukas ngayong linggo ang trial sa paghaharap ng prosekusyon ng video evidence kaugnay ng Article IV ng Articles of Impeachment. Itinatanggi ni Duterte ang mga alegasyon, habang kinukuwestiyon ng kanyang depensa ang proceedings.