INILIPAT ng Senate impeachment court sa Lunes ang testimonya ni Anti-Money Laundering Council (AMLC) Executive Director Ronel Buenaventura. Kinansela rin ang paglilitis sa Biyernes.

Ayon sa depensa, nitong Huwebes lang nito natanggap ang mga summary ng AMLC na may markang “strictly confidential.”

Pinagbigyan ni Presiding Officer Francis “Chiz” Escudero ang hiling ni lead defense counsel Sheila Sison, “ex comitate ex aequo,” o dahil sa courtesy at equity.

Ayon kay Sison, dumating ang mga summary sa email ng kanilang opisina nang 9:34 ng umaga. Pero naipasa lamang ito sa kanilang grupo nang 11:28 ng umaga at nakita lang nila noong lunch break.

May markang “strictly confidential” ang bawat pahina ng 11-pahinang dokumento, kasama ang cover letter. Ayon kay Sison, nakasaad sa cover letter ni Buenaventura na may petsang Oktubre 1, 2026, na hindi isinusuko ng AMLC ang confidentiality ng mga rekord nito.

Aniya, aabot sa 23 hanggang 24 na kahon ng dokumento ang kailangan nilang suriin. “We cannot imagine how we would be able to intelligently respond to the questioning of the prosecution to their intended witness,” wika ni Sison.

Binanggit din niya ang Section 8-A ng Anti-Money Laundering Act, na inamyendahan ng Republic Act 11521. Ayon kay Sison, ang ruling ng korte noong Hulyo 20 ay para lamang sa pag-isyu ng subpoena at hindi hadlang sa pagtutol nila sa tamang panahon.

Ipinunto pa niya na ang kasong ginamit sa ruling ay napagpasyahan bago pa naging batas ang RA 11521.

Tumutol si House prosecutor Rep. Chel Diokno. Ayon sa kanya, nasa depensa na ang mga dokumento ng AMLC mula pa noong Setyembre 2.

Binasa ni Diokno ang ruling noong Hulyo 20. Ayon dito, ang Section 8-A ay para sa “unauthorized and arbitrary disclosures by AMLC personnel” at “does not and constitutionally cannot nullify the lawful subpoena powers of the Senate sitting as an impeachment court.”

Ani Diokno, layon lamang ng probisyon na pigilan ang pag-leak ng impormasyon ng mga tauhan ng AMLC. Dagdag niya, humaharap na noon pa ang mga opisyal ng AMLC sa Sandiganbayan kapag pinadalhan ng subpoena.

Iginiit din ni Diokno na para na ring motion for reconsideration ang argumento ng depensa. Aniya, hindi ito pinapayagan sa mga partido at senator-judge lamang ang maaaring maghain nito.

Sagot ni Sison, mismong ang ruling noong Hulyo 20 ang kumilala na “there is absolute confidentiality involving AMLC personnel.” Aniya, executive director pa ng secretariat ng AMLC ang testigo.

“Your Honor, if the court, as claimed by the defense counsel, recognized the absolute confidentiality, then why did it issue the subpoena in the first place?” tanong ni Diokno.

Nagpahayag si Senator-judge Vicente Sotto III ng “very strong reservations” sa pagpapaliban. Aniya, inakala niyang handa na ang magkabilang panig mula pa noong Hulyo.

Sang-ayon si Senator-judge Alan Peter Cayetano na hindi dapat laging ipinagpapaliban ang paglilitis. Pero ipinunto niyang Huwebes ng umaga lang naipadala ang mga summary, at ang natitirang oras ng Huwebes at ang Biyernes lang ang hinihingi ng depensa.

“In a democracy, the result is important, but the process is as important,” ani Cayetano. Pinaalalahanan din niya ang depensa na huwag abusuhin ang ganitong hiling.

Para kay Senator-judge Risa Hontiveros, ang confidentiality rule ng AMLC ay pagbabawal sa pag-leak ng impormasyon at hindi sa pagsunod sa subpoena.

“Wala pong sinasabing absolute confidentiality na nagtatali sa kamay ng isang impeachment court sa usaping ito,” aniya.

Ayon kay Senator-judge Francis “Kiko” Pangilinan, napagpasyahan na ang usapin noong Hulyo. Pero makatwiran aniya ang isang araw na pagkaantala para makapaghanda ang magkabilang panig.

Nilinaw naman ni Diokno na sa depensa nagmula ang hiling at hindi sa prosekusyon.

Ipinaalala ni Senator-judge Panfilo Lacson na may exception para sa impeachment sa Section 2 ng Republic Act 1405.

Binigyan ni Escudero ang mga senator-judge ng kopya ng Section 8-A para mapag-aralan. Aniya, pagpapasyahan sa caucus o sa open session sa Lunes ang anumang tanong ukol dito.

Ayon kay Escudero, wala ring maihaharap na testigo sa Biyernes “through no fault of the prosecution,” dahil Huwebes lang inilabas ang subpoena sa mga bangko at insurance company.

Hiniling din niya sa prosekusyon na ibigay sa depensa ang anumang summary ng mga susunod na testigo nang hindi bababa sa isang araw bago ang kanilang pagharap. Pumayag dito si Diokno.

Sa Lunes, Oktubre 5, alas-10 ng umaga, uunahin si Buenaventura. Susunod ang mga bangko, ang mga insurance company at ang Bureau of Internal Revenue. Kukumpirmahin ng mga partido ang pagkakasunod-sunod na ito sa Lunes.