HUMINGI nitong Biyernes ng umaga ng tulong si Manila Rep. Bienvenido “Benny” Abante Jr., isa sa mga nag-endorso ng impeachment laban kay Vice President Sara Z. Duterte sa Kamara de Representantes, sa National Bureau of Investigation (NBI) upang matukoy at maimbestigahan ang mga anonymous na account sa social media at mga blogger na umano’y nagpapakalat ng mali at mapanirang impormasyon.

Layunin nitong pag-aralan ang posibleng pagsasampa ng mga reklamong cyberlibel laban sa mga responsable.

Kasama ang kanyang anak na si Atty. Princess Abante, dating tagapagsalita ng Kamara, nagtungo si Abante sa tanggapan ng NBI upang makipagkita kay NBI Director Melvin Matibag dakong alas-9:30 ng umaga nitong Biyernes. Tinalakay nila ang kanyang mga pangamba kaugnay ng umano’y paglaganap ng maling impormasyon sa social media.

Si Abante, na nagsilbing isa sa mga co-chairperson ng House Quad Committee noong ika-19 na Kongreso, ay humingi ng tulong sa NBI upang matukoy ang pagkakakilanlan ng mga taong nasa likod ng mga anonymous na account at online platform na umano’y ginagamit sa pagpapakalat ng mapanirang nilalaman.

“Hindi maaaring gawing kasangkapan ang social media sa pagpapakalat ng kasinungalingan at paninira ng reputasyon ng ibang tao. May kalayaan tayong magpahayag ng ating saloobin, pero may kaakibat itong pananagutan, lalo na kung ang layunin ay manira gamit ang maling impormasyon,” ani Abante, na namuno sa House Committee on Human Rights noong ika-19 na Kongreso at kasalukuyang namumuno rin dito sa ika-20 Kongreso.

“Lumapit tayo sa NBI upang humingi ng tulong sa pagtukoy at pag-imbestiga sa mga anonymous account at blogger na umano’y nagpapakalat ng maling impormasyon. Kung may sapat na ebidensiya at batayan sa ilalim ng batas, handa tayong magsampa ng kaukulang reklamo,” dagdag niya.

Binigyang-diin ni Abante na hindi layunin ng kanyang hakbang na supilin ang lehitimong pagpuna o limitahan ang kalayaan sa pagpapahayag. Sa halip, nais niyang panagutin ang mga indibidwal na umano’y ginagamit ang pagtatago ng kanilang pagkakakilanlan upang magpakalat ng mga mapanirang pahayag.

“Bukas tayo sa kritisismo, lalo na bilang mga lingkod-bayan. Pero magkaiba ang lehitimong pagpuna at ang sadyang pagpapakalat ng kasinungalingan upang sirain ang pangalan at dignidad ng isang tao. Hindi dapat maging lisensiya ang pagtatago sa likod ng pekeng account para manira ng kapwa,” aniya.

Nagpahayag din ng tiwala ang mambabatas sa kakayahan ng NBI na imbestigahan ang mga aktibidad sa internet at alamin kung maaaring managot sa ilalim ng mga umiiral na batas ang mga indibidwal na sangkot dito.

“Ang nais lamang natin ay malaman ang katotohanan at mapanagot ang sinumang mapatutunayang lumabag sa batas. Hindi tayo humihingi ng espesyal na pagtrato. Ang hinihingi natin ay isang patas at masusing imbestigasyon,” ani Abante.

Kasunod ito ng naunang hakbang ni Quezon City Rep. Patrick Michael “PM” Vargas, na naghain ng reklamong cyberlibel sa NBI kaugnay ng katulad na suliranin tungkol sa umano’y pagpapakalat ng maling impormasyon sa internet.

Ipinakikita ng pagbisita ni Abante ang lumalaking pangamba ng mga mambabatas sa mga anonymous na account sa social media at mga blogger na umano’y nagpapakalat ng mapanirang nilalaman habang itinatago ang kanilang pagkakakilanlan.

Sa ilalim ng Republic Act No. 10175, o ang Cybercrime Prevention Act of 2012, ang libel na ginawa sa pamamagitan ng computer system o katulad na pamamaraan ay maaaring magbunga ng pananagutang kriminal, alinsunod sa mga itinatakda ng batas.

Binigyang-diin ni Abante na ang anumang legal na hakbang ay nakasalalay sa mga resulta ng imbestigasyon at sa kasapatan ng ebidensiya laban sa mga responsable.

“Hindi natin hahayaang manaig ang kasinungalingan. Pero nais din nating tiyakin na ang anumang hakbang ay naaayon sa batas at dumaraan sa tamang proseso. Sa huli, katotohanan at hustisya ang dapat manaig,” aniya.