NANINDIGAN si Manila Rep. Bienvenido “Benny” Abante nitong Lunes sa kahalagahan ng patuloy at walang sawang paghahangad ng hustisya, sa pagsasara ng mga pagdinig ng Quadruple Committee ng Mababang Kapulungan ng Kongreso.

“Hustisya,” ani Abante, isa sa mga co-chair ng Quad Committee, “ay hindi basta nakakamtan sa isang pagdinig o sa isang batas lamang—kailangan itong itaguyod nang walang humpay, lalo na kapag ang mismong sistema ang humaharang dito.”

Bilang tagapangulo ng House Committee on Human Rights, pinuri ni Abante ang 15 pagdinig na isinagawa ng komite bilang halimbawa ng matatag at prinsipyadong paglilingkod-bayan sa gitna ng mga banta at kasinungalingan.

“Ang katatagan ng Quad Comm—ang pagtanggi nating pumikit sa harap ng inhustisya, ang paninindigan natin sa katotohanan—ang siyang nagdala sa atin sa puntong ito,” ani Abante.

“Hindi tayo pinanghinaan sa harap ng mga banta. Hindi tayo pinanghinaan sa gitna ng kasinungalingan.”

Ang Quad Committee—binubuo ng mga Komite ng Human Rights, Public Order and Safety, Public Accounts, at Dangerous Drugs—ay nagtapos na sa imbestigasyon nito sa mga koneksyon ng mga aktibidad kriminal sa mga dayuhang POGO operations, kabilang ang illegal na droga at mga umano’y extrajudicial killings (EJKs).

“Ang 15 pagdinig ng Quad Comm ay paalala sa lahat: sa mga misyong tulad nito, kinakailangan ang tibay ng loob!” giit ni Abante.

Nagbabala rin siya na ang mga taong inaasahang papanagutin ay hindi mga walang kapangyarihan.

“Kaharap natin ang mga sindikato ng pananahimik, mga sabwatan ng katiwalian, at isang kulturang sanay sa kompromiso na nagpapalakas sa kasamaan,” wika niya.

“Kapag tayo’y tumigil, panalo ang impunidad.”

Naniniwala si Abante na ang naging trabaho ng komite ay nagsilbing binhi ng pag-asa sa isang pagod at sawimpalad na mamamayan.

“Pag-asa na maririnig ang mga walang tinig. Pag-asa na papanagutin ang mga may sala. Pag-asa na kahit naantala, ang hustisya ay hindi tuluyang mawawala.”

Aniya pa, sa isang bansa kung saan tila naging normal na ang impunidad, hindi na opsyonal ang pagiging matatag—ito’y mahalaga.

“Sa bansang nasanay na sa kawalang pananagutan, ang tibay ng loob ay hindi lang kapuri-puri, ito’y kinakailangan.”

Nagpasalamat din si Abante sa kanyang mga kasamahang mambabatas sa Ika-19 na Kongreso, at sinabing ang kanilang paninindigan para sa katotohanan at pananagutan ay nagsilbing pamantayan para sa mga susunod na lingkod-bayan.

“Ang inyong dedikasyon ay ipinakita sa sambayanang Pilipino kung ano ang tunay na paglilingkod—prinsipyado, matiyaga, at matatag.”

Sa pagharap ng Ika-20 Kongreso, hinikayat ni Abante ang mga bagong mambabatas na ipagpatuloy ang sinimulan ng Quad Committee.

“Nasa inyong mga kamay na ang sulo. Nawa’y taglayin ninyo ang tibay ng loob ng mga nauna. Huwag kayong mapagod sa paghahanap ng katotohanan, sa paglilingkod sa bayan, at sa pagtatanggol sa tama.”

“‘Wag tayong manghina. ‘Wag tayong umurong. Maging matatag tayo sa lahat ng pagkakataon. At sa tamang panahon ng Diyos, aanihin natin ang bunga ng hustisya.”