MALUGOD na tinanggap ni House Assistant Majority Leader Zia Alonto Adiong ng Lanao del Sur noong Martes ang pahayag na inilabas ng mga kilalang dean at propesor ng batas na sumusuporta sa impeachment proceedings laban kay Bise Presidente Sara Z. Duterte at nagbabala laban sa mga pagtatangkang ipagpaliban o hadlangan ang paglilitis sa Senado.

Sinabi ni Adiong na pinagtibay ng pahayag ng mga legal na akademiko at dating mahistrado ang tungkulin ng Senado ayon sa Konstitusyon na ituloy ang paglilitis kay Duterte matapos maipadala ng Kamara de Representantes ang Articles of Impeachment.

“Ang pahayag ng ating mga iginagalang na dean ng batas, propesor, at legal scholars ay nagpapadala ng malakas at mahalagang mensahe na ang impeachment ay isang prosesong konstitusyonal na dapat igalang at hindi dapat ipagpaliban o pahinain dahil lamang sa kaginhawaang pampulitika,” ani Adiong.

“Pinatutunayan ng kanilang posisyon ang matagal nang pinaninindigan ng Kamara na kapag natugunan na ang itinakdang constitutional threshold, tungkulin ng Senado na agad na ituloy ang impeachment trial,” dagdag niya.

Ayon kay Adiong, ipinapakita ng suporta mula sa mga miyembro ng legal academe ang lumalaking pag-aalala sa mga pagtatangkang antalahin o pigilan ang impeachment proceedings sa kabila ng malinaw na mandato ng Konstitusyon.

“Ilan ito sa mga pinakarespetadong legal na isipan ng bansa na malinaw na nagsasalita tungkol sa isyu. Hindi na lamang ito usaping pampulitika. Ito ay tungkol sa katapatan sa Konstitusyon, pananagutan sa pampublikong tungkulin, at pagpapanatili ng tiwala ng publiko sa ating mga institusyon,” aniya.

Nauna nang naglabas ng pahayag ang mga propesor at dean ng batas na pumupuri sa mga miyembro ng Kamara na bumoto upang i-impeach si Duterte at pinaalalahanan ang mga senador na ang pagtangging bumuo bilang impeachment court ay “hindi isang constitutional option” sa ilalim ng Article XI ng Konstitusyon.

Nagbabala rin ang pahayag na ang pagtanggi ng mga opisyal ng gobyerno na gampanan ang kanilang tungkuling konstitusyonal ay maaaring maituring na dereliction of duty, habang ang pagbibigay ng hindi nararapat na pabor sa isang taong walang karapatan dito ay maaaring maging paglabag sa Anti-Graft and Corrupt Practices Act.

Karamihan sa mga lumagda ay mula sa San Beda University Graduate School of Law, kabilang sina retiradong Supreme Court Justice Adolfo Azcuna, dating undersecretary ng environment na si Antonio La Viña, dean na si Fr. Ranhilio Callangan Aquino, Mons. Gary Formoso, Fr. Jaime Achacoso, Dr. George Carmona, Dr. Juan Ruffo Chong, Dr. Manuel Solis, Linda Malenab-Hornilla, Melanie Pimentel, Fr. Jerome Rosalinda, at Fr. Lhem Naval.

Nilagdaan din ang pahayag nina Dean Ada Maria Abad ng Adamson University College of Law, Dean Ma. Soledad Margarita Deriquito-Mawis at Prof. Carlo Cruz ng Lyceum of the Philippines University College of Law, Dean Marivic Trabajo-Daray ng Holy Name University, Prof. Roger Terence Camua ng University of Asia and the Pacific College of Law, at Dean Rabindranath Polito ng Misamis University College of Law.

Sinabi ni Adiong na tinupad ng Kamara ang tungkulin nito ayon sa Konstitusyon nang bumoto ang mga mambabatas upang aprubahan ang Articles of Impeachment laban kay Duterte at ipadala ang kaso sa Senado.

“Sa huli, mas malaki ito kaysa sa mga personalidad o pulitika. Karapat-dapat ang sambayanang Pilipino na makita ang katotohanan sa pamamagitan ng isang patas at kapani-paniwalang impeachment trial,” ani Adiong.