AYON sa isang abogado sa karapatang pantao at pampublikong interes, ang matitibay na ebidensiyang hawak ng prosekusyon laban sa na-impeach na si Pangalawang Pangulong Sara Z. Duterte ay maaaring makahikayat maging sa mga senador-hukom na kaalyado ng mga Duterte na iboto ang kanyang pagkakahatol sa impeachment trial.

Sa isang panayam sa radyo, sinabi ni Antonio Zoleta Bucoy, miyembro ng Free Legal Assistance Group (FLAG), na masyado pang maaga upang pag-usapan ang kinakailangang boto ng dalawang-katlo ng lahat ng 24 senador para sa hatol na guilty, gaya ng itinatadhana ng Konstitusyon. Aniya, ang magiging boto ng mga senador-hukom ay maaaring nakasalalay sa mga ebidensiyang ihaharap.

Sinabi niyang kapag nailatag na ang mga ebidensiya, posible na kahit ang ilang kaalyado ni Duterte sa Senado ay bumoto para sa kanyang pagkakahatol.

“Para sa akin ho, premature pa na pag-usapan yung two-thirds vote. Bakit kamo? Pag nailahad yung ebidensya, hindi tayo nakasisiguro kung lahat ng DDS (diehard Duterte supporters) ay magso-solid acquittal. Dahil meron diyang pwedeng bumaligtad,” ani Bucoy.

Pinangalanan niya sina Mark Villar, Camille Villar, at Pia Cayetano bilang ilan sa mga maaaring bumoto para sa conviction.

Ang tatlong senador ay kabilang sa minorya sa Senado na pinamumunuan ng dating Senate President na si Alan Peter Cayetano.

Inalala rin ni Bucoy ang kaso ng dating Chief Justice Renato Corona, na nahatulang guilty sa kanyang impeachment trial.

“Gaya ng kay dating Chief Justice Corona, na noong magsimula ho ‘yung paglilitis, marami ho ang pabor to acquit, subalit nang mailabas ‘yung ebidensya, maraming bumaliktad and they voted to convict,” aniya.

Tinanong si Bucoy tungkol sa mga reklamong impeachment at sa mga ebidensiyang hawak ng prosekusyon upang suportahan ang mga ito.

Sa tanong kung bakit kasama sa ebidensiya ang Statements of Assets, Liabilities and Net Worth (SALN) at mga bank account ni Duterte mula pa noong 2007, nang siya ay bise alkalde ng Davao City, sinabi ni Bucoy na mahalagang magkaroon ng isang “baseline” o panimulang batayan upang masukat kung paano lumaki ang kanyang yaman.

“Yung unexplained wealth kasi at yung SALN, kinakailangan meron kang baseline na pag-babasehan kung papaano lumobo yung yaman. Kung magsisimula ho tayo nung Vice President lang siya, kulang po ‘yan. Dapat simulan mo kasi ito sa una niyang panunungkulan upang makita ang kanyang kapasidad habang patuloy na nanunungkulan.”

Dagdag pa niya:”Kung wala kang baseline, paano mo masasabi na lumobo ang iyong kayamanan? Kaya relevant ang 2007 records para makita mo kung paano lumobo yung kanyang yaman.”

Binigyang-diin niya na:”Astronomical yung pag-lobo ng kanyang yaman, kaya kinakailangan may baseline.”

Batay sa mga SALN ng Pangalawang Pangulo, tumaas ang kanyang net worth mula ₱7.25 milyon noong 2007 hanggang ₱88.5 milyon noong 2024.

Tungkol naman sa mga pahayag ng Pangalawang Pangulo na naglalaman ng umano’y bantang ipapaslang sina Pangulong Marcos Jr., Unang Ginang Liza Araneta Marcos, at dating Speaker Martin G. Romualdez, sinabi ni Bucoy na hindi ito maituturing na biro o bugso lamang ng damdamin.

“Inulit-ulit niya ‘yun eh… tinanong uli siya, inulit pa niya. Inulit niya dalawang beses pa, magkaibang okasyon. So hindi ito impulsive o biro. Inulit din niya at sinabi pa niyang ‘no joke.'”

Samantala, tungkol sa selyadong kahon ng Bureau of Internal Revenue (BIR) na pinaniniwalaang naglalaman ng mga rekord ng pagbabayad ng buwis ng Pangalawang Pangulo, sinabi ni Bucoy na mahalagang mabuksan ito.

Ipinaliwanag niya na bagama’t pinoprotektahan ng National Internal Revenue Code (NIRC) ang pagiging kumpidensyal ng mga naturang dokumento, pinapayagan ang kanilang pagbubunyag sa kaso ng isang impeachment trial.

“Mahalaga ho ‘yan sapagkat under oath ang mga dokumentong iyon. Pinanumpaan nila ‘yan at may kaakibat na pananagutan sa perjury. Paano nila ‘yan maipapaliwanag? Bagama’t saklaw ito ng confidentiality, dapat manaig ang pampublikong interes. May kapangyarihan ang impeachment court na buksan ang mga ito. Exception po ‘yan sa ilalim ng NIRC.”