BAGSAK sa selda ang 25-anyos na kelot nang maaktuhan ng pulisya na armado ng baril at nanggugulo sa Brgy. Bayanan Lunes ng madaling araw sa Muntinlupa City.

Kaagad nirespondehan ng pulisya ang tawag ng isang residente sa lugar hinggil sa ginagawang panggugulo ni alyas “Ronron” habang iwinawasiwas ang hawak na baril dakong alas-3:00 ng madaling araw na labis na nakabulahaw sa mga natutulog pang residente sa lugar.

Sa ulat na tinanggap ni Southern Police District (SPD) Director P/BGen. Manuel Abrugena, pinalibutan ng mga tauhan ni Muntinlupa Police Chief P/Col. Robert Domingo ang suspek nang maaktuhang hawak pa ang baril na dahilan para mapilitang sumuko ng mapayapa.

Nakumpiska sa kanya ng mga pulis ang isang kalibre .38 Smith & Wesson revolver na may kargang tatlong bala. Nahaharap siya ngayon sa kasong Alarm and Scandal, paglabag sa Comprehensive Firearms and Ammunition Regulation Act at Omnibus Election Code o gun ban.