DALAWANG menor de edad na lalaki, edad 8 at 10 taong gulang, ang dinakip noong Martes ng mga opisyal ng barangay dahil sa umano’y pangmomolestiya sa isang 6-anyos na batang babae sa Barangay Camachiles, Mabalacat, Pampanga.

Sa ulat kay Police Regional Office (PRO) 3 director Brig. Gen. Jean Fajardo, sinabi ni Pampanga police director Col. Jay Dimaandal na ang biktima ay tinulungan ng kanyang ina sa paghahain ng reklamo sa himpilan ng pulisya.

Sa inisyal na pagsisiyasat ng pulisya, naglalaro ang biktima kasama ang kanyang nakababatang kapatid sa labas ng kanilang bahay nang sunggaban siya ng dalawang suspek at dinala sa isang madamong bahagi.

Pagkatapos ay salitang ginahasa ng dalawang batang lalaki ang batang babae.

Matapos ang insidente, nagbihis ang biktima at nakipaglaro sa iba pang mga bata.

Gayunman, kalaunan ay ikinuwento ng biktima sa kanyang ina ang nangyari kaya agad silang humingi ng tulong sa mga opisyal ng barangay na silang humuli sa dalawang batang suspek at saka itinurn over sa Mabalacat City police.

Sabi ni Mabalacat police commander Lt. Col. Efren David, nasa kustodiya na ngayon ng lokal na Department of Social Welfare and Development (DSWD) ang dalawang menor de edad na suspek, habang nakabinbin ang pagsasampa ng kasong paglabag sa Republic Act 7610, o Special Protection of Children Against Abuse, Exploitation and Discrimination Act, laban sa kanila.