ISANG 21-taong-gulang na babae na pinaghihinalaang biktima ng mail-order bride scheme ang na-intercept ng mga opisyal ng Bureau of Immigration (BI) sa Ninoy Aquino International Airport (NAIA).

Ang naturang aksyon ay bahagi ng pinaigting na kampanya ng pamahalaan laban sa human trafficking sa ilalim ng pamumuno ni Pangulong Ferdinand Marcos Jr., na nag-atas sa mga ahensya na palakasin ang proteksyon para sa mga Pilipinong biyahero.

Sa ulat na isinumite kay Immigration Commissioner Joel Anthony Viado, iniulat ng Immigration Protection and Border Enforcement Section (I-PROBES) na ang pasahero ay naharang noong Marso 10 sa NAIA Terminal 3 bago makasakay sa eroplanong Cebu Pacific patungong Guangzhou, China.

Sa imbestigasyon, sinabi ng pasahero na siya ay pupunta sa China upang mag-aral ng wika at umano’y naka-enroll sa isang pampublikong kolehiyo sa Guangdong. Gayunman, napansin ng mga opisyal ang maraming hindi tugma sa kanyang mga pahayag at dokumento.

Kalaunan, inamin ng pasahero na wala siyang aktwal na enrollment at siya ay patungo sa isang kasal na inayos ng isang ahente sa isang hindi kilalang indibidwal. Inamin din niyang makatatanggap siya ng ₱50,000 matapos ang kasal.

“Ang insidenteng ito ay nagpapakita kung paano ginagamit ng mga trafficker ang mga huwad na programang pang-aral sa ibang bansa bilang panakip sa kanilang ilegal na gawain,” ani Viado.

“Nanatiling mapagbantay ang ating mga opisyal sa lahat ng paliparan laban sa anumang modus na naglalagay sa mga Pilipino sa panganib ng pagsasamantala,” dagdag pa niya.

Ang babae ay isinailalim sa kustodiya ng Inter-Agency Council Against Trafficking (IACAT) para sa mas malalim na imbestigasyon at pagsasampa ng kaukulang kaso.