HINDI papayagan ang house arrest para kay Pastor Apollo C. Quiboloy habang ang kanyang mga masugid na taga-suporta ay nahaharap sa mga kasong sedition and inciting to sedition sa Department of Justice (DOJ), na inihain ng Philippine National Police Criminal Investigation and Detection Group (PNP-CIDG).

Ang mga kasong ito ay may kaugnayan sa pagtulong sa pag-iwas ni Quiboloy sa pag-aresto at sa panawagan ng kanilang mga miyembro na lumaban sa pamahalaan ni Pangulong Ferdinand Marcos Jr. noong nakaraang buwan.

Si Quiboloy, na isang senatorial aspirant sa Eleksyon 2025, ay nahaharap din ng petisyon para sa kanyang diskwalipikasyon.

Mahigpit na mga patakaran sa bilangguan ang magbabawal sa kanya na gumamit ng cellphone at iba pang komunikasyon upang mangampanya habang nakakulong.

Noong Huwebes, tinanggihan ng Pasig City Regional Trial Court Branch 159 ang hiling ni Quiboloy para sa hospital arrest sa gitna ng kasong human trafficking na kinakaharap niya.

Kasalukuyang nakakulong si Quiboloy sa maximum-security PNP Custodial Center sa Camp Crame.

Ayon kay Brigadier General Nicolas D. Torre III, dating direktor ng Police Regional Office 11 sa Southern Mindanao na nanguna sa operasyon para madakip si Quiboloy, inakusahan ang mga abogado at taga-suporta ni Quiboloy ng paglabag sa Article 139 ng Revised Penal Code (sedisyon) at Article 142 (pag-uudyok sa sedisyon) alinsunod sa Section 6 ng Republic Act No. 10175 o Cybercrime Prevention Act of 2012.

Ayon kay Torre, pinilit ng mga akusado na pangunahan ni Quiboloy lead counsel Israelito Torreon na linlangin ang mga awtoridad sa pamamagitan ng pagpapakita na ang pagkahuli kay Quiboloy ay isang anyo ng pamumulitika laban sa kanya.

Ipinahayag ng PNP-CIDG sa kanilang reklamo sa DOJ na ginamit ng mga akusado ang dahas at barikada upang hadlangan ang paghahanap at pinukaw ang publiko na sugurin ang Malacañang upang pigilan ang pag-aresto kay Quiboloy.

Kasama sa mga kinasuhan sina Sonshine Media Network International (SMNI) political commentators Lorraine Badoy-Partosa at Jeffrey Celis alyas “Ka Eric,” Kingdom of Jesus Christ (KOJC) executive secretary Eleanor Cardona, Carlo Catil, Kathleen Kaye Laurente, Trinidad Arafol, Lord Byron Cristobal, Joey Espina Sun, Esteban Lava, Jose Lim III, Marie Dinah Tolentino-Fuentes at ilan pang mga hindi pinangalanang akusado.

Kapwa sina Badoy-Partosa at Celis ay dati ring mga tagapagsalita ng National Task Force to End Local Communist Armed Conflict (NTF-ELCAC) noong administrasyon ni dating Pangulong Rodrigo R. Duterte, na malapit na kaibigan ni Quiboloy.

Ang kaso ng sedisyon ay may piyansa at maaaring humarap ang mga akusado sa pagkakakulong ng hanggang 12 taon at multang umaabot sa P2 milyon kung mapatunayang nagkasala.

Ayon kay Brig. Gen. Jean S. Fajardo, tagapagsalita ng PNP, ang reklamo ay inihain matapos ang 16-araw na operasyon upang arestuhin si Quiboloy at ang kanyang limang kasamang akusado sa kasong human trafficking at sexual abuse sa KOJC compound.

“There was a deliberate attempt on their part to really hide the whereabouts of Quiboloy and others. We were able to prove that when it turned out that Quiboloy and others were really hiding inside the KOJC. There was an intention to really deny their location. We have documented all their actions against our policemen,” ani Fajardo.

Ayon kay Torre, naitala ng kanilang grupo ang mga kilos ng mga akusado tulad ng pagtawag sa publiko na mag-alsa laban sa gobyerno at pagpigil sa mga pulis na magsilbi ng mga warrant of arrest laban kina Quiboloy at iba pa.

Inilahad ng reklamo ng PNP-CIDG na sina Torreon at iba pang mga sumusuporta kay Quiboloy ay nag-barricade sa KOJC compound nang subukang ihain ng mga pulis ang warrant of arrest noong Agosto 24.

Dagdag pa ng PNP-CIDG, sinubukan ng mga akusado na linlangin ang mga awtoridad sa pamamagitan ng pagsasabing ang warrant of arrest ay dapat lamang ipatupad laban kay Sylvia Cemanes, na nakatira sa Pasig City, at hindi sa Davao City.