NALAMBAT ng pulisya ang isa sa mga sakay ng AUV na nanghablot ng bag ng 40-anyos na babae habang naglalakad sa Barangay Paang Bundok, La Loma sa lungsod, ayon sa ulat kahapon.

Ayon kay QCPD La Loma Police Station 1 chief, police P/Lt. Col. Ferdinand Casiano, habang nakapayong, naglalakad ang biktima na isang call center agent sa nasabing lugar nang hintuan ng AUV.

Isa sa mga suspek ang agad na bumaba at hinablot ang bag ng biktima na nanlaban pa kung kayat natumba ito sa kalsada.

Agad na nagsumbong ang biktima sa La Loma police station na agad namang nagresponde, at sinuri ang mga CCTV sa lugar na pinangyarihan ng insidente.

Makalipas ang 10-oras, natunton ng mga pulis ang kinaroroonan ng AUV at nadakip ang 38-anyos na suspek.

Patuloy pang tinutugis ang mga kasamahan ng suspek na nahaharap sa kasong robbery.