PINUNA ng mga opisyal ng seguridad ang mga pahayag na ang bansa ay isa na ngayong ‘hot spot’ para sa marahas na ekstremismo, at marami ang nagtatanong kung bakit ang Pilipinas ang sinisisi sa umano’y kapabayaan nsa security na nagbigay-daan sa dalawang armado na pumatay ng hindi bababa sa 15 katao at makasugat ng dose-dosenang iba pa sa tanyag na Bondi Beach sa Sidney.

“Binabayo tayo ng international media sa kaliwa’t kanan ng mga pahayag na ang dalawang armado ay umano’y nagsanay sa Mindanao. Tayo ang sinisisi sa kapabayaan ng Australia,” ayon sa isang opisyal ng seguridad na nagsalita sa kundisyong manatiling hindi pinangalanan, sa panayam ng Journal Group.

Sinabi niya na bagama’t ang pamahalaan ng Australia sa pamamagitan ng Australian Federal Police (AFP) at ng Embassy of Australia ay matagal nang malapit na katuwang ng Pilipinas sa pagtugon sa mga transnational crime, nananatili ang katotohanang may maluwag na seguridad sa Bondi Beach na nagbigay-daan sa mga armado na makuha ang kanilang mga armas at barilin ang kanilang mga target na para bang nasa isang hunting mission.

Ang Australian Embassy sa pamamagitan ng AFP ay nagbibigay ng malaki at pangmatagalang kooperasyon, pagsasanay, kagamitan, at intelligence support sa PNP at iba pang law enforcement agencies sa bansa upang labanan ang transnational crime at terorismo sa pamamagitan ng iba’t ibang inisyatiba gaya ng intelligence, imbestigasyon, surveillance, at critical incident management training.

Nag-donate rin ito ng mahigit P400 milyon na halaga ng mga sasakyan, computer, surveillance gear, at forensic equipment sa mga opisyal ng law enforcement ng Pilipinas sa paglipas ng mga taon.

Ngunit ang insidente sa Bondi Beach ay nagtulak kay National Security Adviser Eduardo M. Año na ibasura ang mga pahayag mula sa Western media na tinatatakan ang Pilipinas bilang isang “hotspot” ng marahas na ekstremismo o ideolohiyang Islamic State, na tinawag niyang luma at mapanlinlang.

Lumabas ang mga ulat ng Western media matapos sabihin ni Australian Prime Minister Anthony Albanese na ang mga armado ay tila pinakilos ng “Islamic State ideology.”

Ayon pa sa iba pang ulat ng Western media, ang mga suspek na kinilalang sina Sajid Akram at ang kanyang anak na si Naveed ay naglakbay sa Pilipinas upang tumanggap ng “military-style training” ilang buwan bago sila nagsagawa ng pamamaril sa isang Hanukkah celebration sa Bondi Beach.

Sa isang pahayag, nilinaw ni Sec. Año na patuloy pa ang imbestigasyon hinggil sa layunin ng paglalakbay ng dalawang indibidwal na iniuugnay sa pamamaril sa Bondi sa Australia.

Gayunman, iginiit niya na walang natanggap na ulat ang intelligence sector ng Pilipinas na nagsasaad na ang dalawang armado sa Bondi ay tumanggap ng military training sa Pilipinas.

“Walang balidong ulat o kumpirmasyon na ang dalawa ay tumanggap ng anumang uri ng military training habang nasa bansa, at walang ebidensiyang sumusuporta sa ganitong pahayag sa kasalukuyan. Ang simpleng pagbisita (sa bansa) ay hindi sapat upang patunayan ang mga alegasyon ng terrorist training, at ang tagal ng kanilang pananatili ay hindi magpapahintulot ng anumang makabuluhan o organisadong pagsasanay,” sabi ni Sec. Año.

Maging ang mga netizen ay nagpahayag din ng kanilang pananaw hinggil sa mga pahayag na ang mga armado sa Bondi ay nagsanay sa Mindanao.

“The suspects are Australian residents-one lived there for decades and the other was born and raised in Australia. If the crime happened in Australia, then prevention and monitoring were Australia’s responsibility,” ayon sa isa habang kinukwestiyon ang isang artikulo ng New York Post.

“This needs better context, New York Post,” dagdag pa ng netizen.

“A past trip to the Philippines is still under investigation, and travel alone is not evidence. Labeling our country a ‘terror hotspot’ without proof only spreads fear and unfairly degrades Filipinos. Hold individuals accountable—not an entire country or its people,” dagdag ng babae.

Sinabi ni Sec. Año na ang Armed Forces of the Philippines at ang PNP ay malaki na ang ibinagsak ng mga grupong may ugnayan sa ISIS sa bansa, at binanggit na ang mga organisasyong ito ay nakaranas ng “weakened structures” at “matinding pagbaba” ng mga operasyon mula nang maganap ang kilalang 2017 Marawi siege.

“Bilang resulta, wala nang naitalang mga aktibidad ng terrorist training o malalaking operasyon ng mga grupong kaanib ng ISIS mula pa noong 2017,” ayon sa opisyal.

Sinabi naman ni Armed Forces spokesperson Colonel Francel Margareth Padilla na wala silang nakitang ebidensiya na ang dalawang suspek sa pamamaril sa Bondi Beach ay sumailalim sa terrorist training habang nasa bansa.

“Ang data po natin dyan from our field units is that there are no activities such as trainings or any local terrorist activities na nangyari dyan sa lugar na pinuntahan nila,” the AFP official said.

“Not because nag-transit po sa ating bansa eh that means meron na tayong ganitong activities,” she added.

“We work on the numbers, in the empirical data. So from 2016, we began with around 1,200 ang number nitong local terrorist groups (LTG) na tinutugis po natin. Now, 2025, we’re down to 50,” explained Padilla.

Sinabi rin ni Año na kahit ang mga naunang pagsusuri ng UN at US security sectors ay hindi isinaalang-alang ang ganitong senaryo, habang idinagdag na patuloy na nakikipag-ugnayan ang pamahalaan sa mga awtoridad ng Australia hinggil sa paglalakbay ng mga pumatay sa Bondi na kinilalang sina Sajid Akram at ang kanyang anak na si Naveed, na nasa Maynila at Davao City mula Nobyembre 1 hanggang 28.

“Ang parehong opisyal na pagtatasa ng UN at ng gobyerno ng US ay nagpapakita na mga labi na lamang ng mga grupong ito ang natitira dahil sa tuloy-tuloy na mga operasyong pangseguridad, mga pagsisikap sa peace-building, at malakas na partisipasyon ng komunidad,” paliwanag niya.

Tinanggihan din ni Pangulong Ferdinand R. Marcos Jr. ang mga katulad na pahayag mula sa ilang media outlet na tinatakan ang Pilipinas bilang isang “ISIS training hotspot” kasunod ng mga ulat na bumisita sa bansa ang mga suspek sa pamamaril sa Bondi.

Sinabi ni Palace Press Officer, Undersecretary Claire Castro na walang ebidensiyang naiharap upang ipakitang ginamit ang Pilipinas para sa terrorist training.

Ayon kay Sec. Año, nagbigay ang pamahalaan ng makabuluhang political autonomy at development funding sa Bangsamoro Autonomous Region in Muslim Mindanao (BARMM) upang makatulong na mapabuti ang domestic security environment nito.

“Pinananatili ng pamahalaan ng Pilipinas ang isang mapagbantay, intelligence-driven counterterrorism program at malapit na nakikipagtulungan sa mga international partners upang matiyak na ang teritoryo ng Pilipinas ay hindi nagagamit para sa mga layuning terorista,” aniya.

“Binibigyang-diin ng NSC ang kahalagahan ng evidence-based reporting at responsableng pampublikong diskurso,” dagdag niya.

“A mere visit (to the country) does not support allegations of terrorist training, and the duration of their stay would not have allowed for any meaningful or structured training… there have been no recorded terrorist training activities or significant operations by these ISIS-affiliated groups since 2017,” ani Sec. Año.

Kinumpirma rin ng Bureau of Immigration na ang 50-anyos na si Sajid Akram at ang kanyang 24-anyos na anak na si Naveed Akram ay dumating sa Pilipinas noong Nobyembre 1 at parehong iniulat ang Davao bilang kanilang huling destinasyon.

Umalis ang dalawa noong Nobyembre 28 sa isang connecting flight mula Davao patungong Maynila, na ang huling destinasyon ay Sydney.

Sa kanyang panig, sinabi ni Acting PNP chief, Lieutenant General Jose Melencio C. Nartatez, Jr. na iniutos niya ang masusing imbestigasyon sa kamakailang pagbisita sa Pilipinas ng mag-amang suspek sa mga pagpatay sa Bondi.

Binigyang-diin ng hepe ng pulisya ang pangangailangang matukoy ang layunin ng paglalakbay ng mga suspek sa Pilipinas at maitala ang kanilang mga galaw habang nasa bansa.

Sinabi ng PNP chief na tinitiyak ng mga imbestigador ng pulisya ang mga lugar na kanilang pinuntahan, ang mga indibidwal na kanilang nakasalamuha, at ang kanilang mga tinuluyan habang sila’y narito. Aniya, mahalaga ang mga detalyeng ito sa pagbuo ng malinaw na larawan ng kanilang mga aktibidad.

“This matter is being investigated as we seek to determine the reason behind their visit to the Philippines. Inaalam natin kung saang mga lugar sila nagpunta, sino ang kanilang mga nakausap, at saan sila namalagi habang nandito sa bansa,” said Lt. Gen. Nartatez.

Sinabi ng pinakamataas na opisyal ng PNP na ang lahat ng impormasyong makakalap ng PNP ay kinakailangan upang matukoy ang motibo at sa huli ay maisagawa ang angkop na mga hakbang laban sa lahat ng mga responsable sa likod ng pamamaril sa Australia.

Sinabi rin ni Lt. Gen. Nartatez na wala silang natukoy na anumang malaking banta sa seguridad sa bansa matapos ang terror attack sa Bondi Beach.

“We have not monitored any security threats but are not lowering our guard to ensure the safety of everyone,” ayon sa hepe ng pulisya.