𝗠𝗔𝗚𝗜𝗡𝗚 𝗮𝗻𝗴 c𝗵𝗮𝗶𝗿𝗺𝗮𝗻 𝗻𝗴 𝗛𝗼𝘂𝘀𝗲 𝗖𝗼𝗺𝗺𝗶𝘁𝘁𝗲𝗲 𝗼𝗻 𝗗𝗮𝗻𝗴𝗲𝗿𝗼𝘂𝘀 𝗗𝗿𝘂𝗴𝘀 𝗻𝗮 𝘀𝗶 𝗦𝘂𝗿𝗶𝗴𝗮𝗼 𝗱𝗲𝗹 𝗡𝗼𝗿𝘁𝗲 𝟮𝗻𝗱 𝗗𝗶𝘀𝘁. 𝗖𝗼𝗻𝗴. 𝗥𝗼𝗯𝗲𝗿𝘁 𝗔𝗰𝗲 “𝗔𝗹𝗮𝘀” 𝗦. 𝗕𝗮𝗿𝗯𝗲𝗿𝘀 𝗮𝘆 𝗻𝗮𝗸𝗶𝗸𝗶𝗶𝘀𝗮 𝗻𝗮 𝗿𝗶𝗻 𝘀𝗮 𝗽𝗮𝗻𝗮𝘄𝗮𝗴𝗮𝗻 na 𝗽𝗮𝗻𝗴𝗮𝗹𝗮𝗻𝗮𝗻 𝗻𝗴 𝗣𝗵𝗶𝗹𝗶𝗽𝗽𝗶𝗻𝗲 𝗔𝗺𝘂𝘀𝗲𝗺𝗲𝗻𝘁 𝗮𝗻𝗱 𝗚𝗮𝗺𝗶𝗻𝗴 𝗖𝗼𝗿𝗽𝗼𝗿𝗮𝘁𝗶𝗼𝗻 (𝗣𝗔𝗚𝗖𝗢𝗥) 𝗮𝗻𝗴 𝗱𝗮𝘁𝗶𝗻𝗴 𝗖𝗮𝗯𝗶𝗻𝗲𝘁 𝗼𝗳𝗳𝗶𝗰𝗶𝗮𝗹 𝗻𝗮 𝗻𝗮𝗴𝗹𝗮𝗸𝗮𝗱 𝗮𝘁 𝗻𝗮𝗻𝗴𝗮𝘀𝗶𝘄𝗮 𝗽𝗮𝗿𝗮 𝗺𝗮𝗯𝗶𝗴𝘆𝗮𝗻 𝗻𝗴 𝗹𝗶𝘀𝗲𝗻𝘀𝗶𝘆𝗮 𝗮𝘁 𝗺𝗮𝗸𝗮𝗽𝗮𝗴-𝗼𝗽𝗲𝗿𝗮𝘁𝗲 𝘀𝗮 𝗣𝗶𝗹𝗶𝗽𝗶𝗻𝗮𝘀 𝗮𝗻𝗴 𝗣𝗵𝗶𝗹𝗶𝗽𝗽𝗶𝗻𝗲 𝗢𝗳𝗳𝘀𝗵𝗼𝗿𝗲 𝗚𝗮𝗺𝗶𝗻𝗴 𝗢𝗽𝗲𝗿𝗮𝘁𝗼𝗿𝘀 (𝗣𝗢𝗚𝗢).

Binigyang diin ni Barbers na napakahalagang mahubaran ng maskara at malantad sa publiko ang pagkakakilanlan ng nasabing ex-Cabinet official dahil ang pag-aakto nitong “padrino” para sa POGO ay isang seryosong bagay na maituturing na pagta-traydor sa bayan sapagkat mistulang pinaboran pa nito ang mga Intsik.

Ayon kay Barbers, hindi dapat ipagkibit-balikat ng pamahalaan ang ginawang pagkilos ng dating Cabinet official para paboran ang POGO sapagkat hindi nito isinaalang-alang ang kapakanan at seguridad ng bansa.

Para kay Barbers, dapat lamang na magsagawa ng isang malalim na imbestigasyon ang Kamara de Representantes patungkol sa naturang kontrobersiya.

Pagdidiin pa ng kongresista, napaka-importante din na mabusisi ng husto kung sino-sino pang mga government officials ang lumagda sa mga dokumento na nagbibigay ng pahintulot o permiso para makapag-patayo ng mga building ang mga operators ng POGO.

Sabi ng mambabatas, kailangan tignan din sa ikakasang imbestigasyon ng Mababang Kapulunhan kung legal o illegal ang mga papeles ng mga empleyadong Intsik na nagtrabaho sa POGO sapagkat may mga nakalap silang impormasyon na walang sapat na papel ang mga Chinese na empleyado ng POGO.

“Para sa akin, dapat na talagang pangalanan itong ex-Cabinet official na ito dahil ang ginawa niya ay malinaw na pagtataksil sa bayan. Sapagkat mas inuna pa niya ang interes at kapakanan ng mga dayuhan kesa sa sarili niyang mga kababayan. Kaya kung ako ang tatanungin, kailangan siyang maimbestigahan,” wika ni Barbers.