INARESTO ng Bureau of Immigration (BI) ang dalawang Chinese nationals noong Enero 24 sa Ninoy Aquino International Airport (NAIA) Terminal 3 dahil sa pekeng exit clearances.

Sinabi ni Dennis Javier, pinuno ng BI NAIA 3, na naharang sina Wang Changru, 53, at Cui Wen, 33, bago sumakay sa Cathay Pacific Airlines flight patungong Hong Kong dahil sa pekeng dokumento.

Natuklasan na overstaying sila dahil dumating sa bansa noong 2019 pa.

Pero nagprisinta sila ng emigration clearance certificates (ECC) na umano’y inilabas nitong Enero 23 at nagsasabing pinahihintulutan silang manatili sa bansa hanggang Pebrero.

Nakumpirma kalaunan na peke ang ipinakitang ECCs kaya’t agad na inaresto ang dalawa.